Campadis grischuns nodan dapi bunamain diesch onns in augment tar las pernottaziuns. Cifras provisoricas da l'Uffizi per economia e turissem suttastritgan che la situaziun da pandemia ha rinforzà il trend. Bunamain 476'000 pernottaziuns hai dà l'onn passà sin campadis grischuns. Quai correspunda ad in augment da 30%, cumpareglià cun l'onn avant.
Parcadis provisorics èn tschertgads
Er quest onn vegnan las cifras da pernottaziuns sin ils campadis a crescher, manegia Gerry Meyer da la societad Wohnmobilland Schweiz. Sper ils campadis regulars sajan cunzunt er parcadis provisorics adina pli dumandads per plazzar las rulottas autarcas. Cunquai che quels sajan savens equipadas cun forza electrica da battarias e tancs d'aua, funcziunian quels savens senza gronda infrastructura. Uschia possian quels vegnir parcads per exempel sin in bain puril.
En il Grischun datti in grond basegn da parcadis provisorics.
En auter pajais, sco en Germania u en Frantscha, è il concept da campar sin in bain puril gia popular – en Grischun però anc rar, manegia Gerry Meyer vinavant. Quai malgrà ch'ils impediments en il chantun na sajan betg uschè gronds.
Puras e purs possian offrir fin a trais parcadis provisorics per l'uschenumnà campar da passants. Latiers na dovria naginas mesiras da construcziun, conferma Martin Renner. Talas rulottas possian mintgamai restar trais notgs sin il bain puril. Ordavant stoppia la vischnanca però anc dar in permiss al bain puril.
La purschida è ina buna pussaivladad per mussar als giasts in aspect positiv da la lavur agricultura.
Differentas plattafurmas d'internet sco er l'uffizi per agroturissem tschertgan puras e purs interessads. Quels duajan cunzunt ponderar sch'ils parcadis avessan plaz en la structura dal bain e sche l'idea vegniss purtada da tut la famiglia da mainagestiun. Malgrà che l'interess saja grond na possian pli probabel betg vegnir creads ina pluna parcadis. I saja però pussaivel d'offir quella pussaivladad en tut las valladas.