Siglir tar il cuntegn

Header

Heinz Brand e Jon Domenic Parolini
Legenda: Heinz Brand (dretg) ha crititgà il plan da temp Jon Domenic Parolini sa defenda. RTR
cuntegn

Chantun Parolini : «Ussa avain nus propi dà gas»

Il cusseglier naziunal da la PPS Heinz Brand ha crititgà il plan da temp per ils gieus olimpics d’enviern 2026 en il Grischun. Il termin per la votaziun na saja betg tschernì bain. Il cusseglier guvernativ Jon Domenic Parolini conceda ch’igl è stretg, ma igl è tenor el ina via pussibla.

video
Heinz Brand crititgescha regenza grischuna
Or da RTR dals 20.09.2016.
laschar ir

En la sessiun dal december 2016 decida il Cussegl grond davart in credit da 25 milliuns francs per la candidatura per ils gieus olimpics 2026 en il Grischun. Il favrer decida il suveran Grischun a l’urna. Tenor Heinz Brand na permetta quest plan da termins betg da far campagnas d’infurmaziun.

Tenor Jon Domenic Parolini saja quai dentant la dretga via da laschar votar il pievel avant il mars, cura che Swiss olympic decida per ina da las 4 candidaturas svizras. Cun in gea a l’urna avess'ins in signal da la populaziun per ils gieus olimpics. Datti in na, è il project a fin.

Uschiglio vegn adina crititgà che la politica saja uschè plauna. Ussa vain nus propi dà gas e jau sper che quai vegnia renconuschì.
Autur: Jon Domenic ParoliniCusseglier guvernativ

Dapli infurmaziuns sur dal project suondian, tenor Parolini, bainbaud. La regenza haja survegnì il concept grop la fin d'avust. Dapi lura na sajan betg passadas bleras emnas. Ils puncts impurtants e la conclusiun tge puncts che sajan anc insuffizients, vegnan integrads en la missiva. Quella sto vegnir inoltrada al Cussegl grond l'october. La regenza vegn a decider davart la missiva, sche tut va bain, l’emna che vegn.