Siglir tar il cuntegn

Header

audio
Stefan Engler sa retira sco president da la PCD - ils motivs
Or da Actualitad dals 26.06.2020.
laschar ir. Durada: 05:00 minutas.
cuntegn

Partida cristiandemocratica Stefan Engler sa retira sco president da la PCD

Stefan Engler sa retira sco president da la PCD Grischun. Il cusseglier dals chantuns è stà dapi il 2012 a la testa dals cristiandemocrats dal chantun.

En vista a l’elecziun dal gremi da partida, ils 2 da settember 2020 ha Stefan Engler decis ch’el na veglia betg pli cuntinuar, ha communitgà la PCD. Er la vicepresidenta Silvia Casutt-Derungs ha annunzià sia demissiun. La PCD Grischun sto pia ir a la tschertga da dus novs candidats per la testa da la partida. Ils ulteriurs represchentants sa mettan a disposiziun per in'ulteriura perioda d'uffizi.

Stefan Engler

Il cusseglier dals chantuns è stà dapi il 2012 a la testa dals cristiandemocrats dal chantun. Avant era el tranter auter 12 onns cusseglier guvernativ, president dal cirquit Belfort e president communal da Surava. Sut la direcziun da Stefan Engler ha la PCD Grischun gì tant success sco gia ditg betg pli.

Silvia Casutt-Derungs

Il medem mument ha era vicepresidenta Silvia Casutt-Derungs inoltrà sia demissiun. Ella è dapi il 2010 deputada en il Cussegl grond per il cirquit Glion. Plinavant è ella presidenta da la cumissiun da gestiun dal Cussegl grond. Pli baud era ella presidenta da la vischnanca da Falera.

Facit dad Engler davart la lavur da partida

«La lavur da partida è savens stentusa. Chapesch'ins la lavur dentant era sco contribuziun per la furmaziun da l'opiniun politica e nizzegia ella per vegnir en contact cun burgaisas e burgais u autras partidas per obtegnair differents puncts da vista sin dumondas socialas, lura prestan las partidas er ina prestaziun Service public. Quai è lura puspè la vart che cuntenta.»

Ord l'archiv

Sco cusseglier dals chantuns resta Stefan Engler vinavant en uffizi. L'atun passà è el vegnì reelegì:

RTR novitds 09:00

Artitgels legids il pli savens

Scrollar a sanestra Scrollar a dretga