Géraldine Danuser, la politicra da 25 onns, ha schon co-fundà e presidià la partida giuvna. L’onn passà ha ella cumbattì per in sez en il Cussegl dals chantuns – dentant senza success. Quest onn è ella vegnida elegida en il cussegl communal da Cuira. Sia finamira sco presidenta da partida saja, da cuntanscher en dus onns fermezza da fracziun en il Cussegl Grond. Quai ha ella ditg en in'intervista cun la gasetta «Südostschweiz».
Danuser surpiglia il presidi da Gaudenz Bavier. Quel ha annunzià il schaner da quest onn, ch'el vul da giu ses post. Bavier vul sa concentrar sin sias incumbensas tar la federaziun da skis chantunala e naziunala.
Parolas per votaziun
La partida ha vinavant decis da sustegnair l'iniziativa per concerns responsabels. Tar l'iniziativa cunter affars cun material da guerra n'han els decidì nagina parola, dentant la libertad da votar. La partida naziunala ha decis in NA a l’iniziativa.
Sin in clic tut las fatschentas federalas e communalas.
