Siglir tar il cuntegn

Header

cuntegn

Chantun Partidas dal center ston sa mover

Per il politolog Georg Lutz è in ir ensemen e collavurar da las partidas dal center indispensabel. Ellas vegnian baud ni tard a sentir il squitsch.

Suenter las elecziuns naziunalas cun il stausch a dretga, hai gì num che las partidas dal center stoppian sa mover. Ed era l’appel per ina fracziun communabla tranter burgais-democrats, cristiandemocrats e verd-liberals ha fatg la runda: lura anc surtut per insaco spendrar il sez dad Eveline Widmer-Schlumpf en il Cussegl federal.

Entant na ston ins betg pli far gliez. Ed uschia stat è il center magari airi. Almain fin suenter l'elecziun dal Cussegl federal, di la Partida burgais-democratica. Discurs cun tschellas partidas da mez saja in project per la proxima legislatura.

audio
Mezdi: Co vinavant cun il center politic?
ord Actualitad dals 30.10.2015.
laschar ir. Durada: 4 minutas 15 Secundas.

«Ultims 4 onns betg vesì center»

Per il politolog Georg Lutz è in ir ensemen e collavurar da la PBD, PCD e PVL indispensabel. Ellas vegnian baud ni tard era sut squitsch. «Ils ultims 4 onns n’avain nus betg vesì quest center, ch’era anc vegnì rinforzà tar las elecziuns federalas il 2011», di Lutz. «A las partidas dal center n’èsi betg reussì da posiziunar in center sco ina forza communabla.» E qua vegnia il squitsch schon ad esser fitg grond tar las trais partidas dal center che quai sa meglierescha.

Collavuraziun sistematica

Ed il politolog discurra qua betg mo d'ina collavuraziun punctuala, mabain sistematica. El discurra d’ina cooperaziun pli stretga, nua che lur politisar vegn coordinà, nua che las trais partidas sviluppeschan ensemen projects ed emprovan era da chattar per quels lura la maioritad en il parlament.

Istorgia e tradiziun sco impediment

En il center dettia memia bleras partidas e memia bleras pitschnas. I stoppia perquai dar ina raschlada, «in ir ensemen». Il process da fusiunar partidas saja dentant lung e stentus. Las partidas stoppian avair la voluntad da propi vulair. Ina fracziun dal center en il parlament, ubain perfin fusiuns da partidas, na vegnian strusch a far naufragi pervia da differenzas politicas, mabain pervia da lur istorgia e lur tradiziuns, uschia il politolog Georg Lutz vinavant.

Artitgels legids il pli savens