Dapi l’entschatta da la crisa han 514 persunas prestà tut en tut 4'029 dis da servetsch tar la protecziun civila. Martin Bühler, il manader dal stab da crisa chantunal ha confermà quai. Tenor sias indicaziuns è mintga 5avel entrà voluntarmain en servetsch u ha prolungà quel.
Cunzunt a l’entrada d’ospitals e chasas da dimora è la protecziun civila vegnida en acziun, uschia Bühler vinavant. Là hajan ins fatg controllas. Actualmain s'engaschian anc 132 persunas da la protecziun civila. Ils servetschs dal militar n’hajan ins fin uss betg duvrà.
