La pli gronda part dals chatschaders adempleschia la cumprova da tir mintgamai gia l’emprima giada ch’els giajan en il stan da tir, di Robert Brunold.
Che dapli chatschaders na tutgian betg la preda ed ch'i dettia dapli selvaschinas blessadas, sche la cumprova da tir na stoppia betg vegnir ademplida, na crai il president dals chatschaders grischuns betg. Passa 90 pertschient d'els giajan gia dapi onns a chatscha ed hajan gia pliras giadas fatg la cumprova.
Quatter giadas in dad otg
Per obtegnair la patenta da chatscha èsi da mussar si, ch’ins sajetta bain – quai cun la cumprova da tir. Lezza survegn ins cun tutgar quatter giadas en seria in dad otg u dapli.
Mintg’onn dovri questa cumprova, danor quest onn. La regenza ha prendì la decisiun sin recumandaziun dals inspecturs chantunals da chatscha. La raschun: In manaschi da tir normal na saja mumentan cun las prescripziuns pervi da corona betg pussaivel.