Siglir tar il cuntegn

Header

cuntegn

Chantun Pauc fain, però bun

La stad 2017 ha purtà per part in terz pli pauc fain. Quai pervia da las grondas chaliras durant il mais zercladur e fanadur. A stretgas tar ils purs vegn quai dentant tuttina betg a manar.

audio
Mezdi: Racolta da fain 2017
ord Actualitad dals 22.08.2017.
laschar ir. Durada: 1 minuta 49 Secundas.

Las premissas da la primavaira empermettevan ina buna racolta da fain. Las chaliras il zercladur e fanadur han dentant fatg donn als prads ed al fain. Batist Spinatsch dal Plantahof quinta che la racolta da fain da quest onn saja circa in terz pli pitschna che quella d’avant in onn. Percunter accentuescha el, che la qualitad dal fain da quest onn saja fitg buna.

Tenor Batist Spinatsch èsi però difficil da far ina bilantscha per l’entir chantun. Regiunalmain dettia fitg grondas differenzas. En Stussavgia per exempel hajan ils purs savì far ina fitg buna racolta da fain – sumeglianta a quella dal 2016. Grazia a quella fitg buna racolta da l'onn passà han la gronda part dals manaschis anc reservas e na ston betg cumprar tiers fain per l’enviern.

La speranza da l'agricultura schai quest onn tar in bun, enfin fitg bun segund e terz tagl. E cun in tal pon ins era quintar. La plievgia ed ils dis suleglivs en l'avust èn bunas premissas.

RR actualitad 11:00

Artitgels legids il pli savens