Siglir tar il cuntegn

Chantun PBD avess giavischà midada tar departament da construcziun

La partida burgais-democratica beneventa las midadas tar ils departaments aifer la regenza grischuna. Tar il departament da construcziun, traffic e selvaschina avess la PBD dentant er giavischà ina midada. Quest departament resta dentant en ils mauns da Mario Cavigelli.

Purtret da Gian Michael.
Legenda: Gian Michael, schef da fracziun da la PBD n'è betg propi cuntent ch'il departament da construcziun, traffic e selvaschina resta en ils medems mauns. Keystone

Al schef da fracziun da la PBD Gian Michael, pari donn ch'i resta be en in departament tut sco fin qua. Sia partida avess giavischà er là ina midada. Per Jon Domenic Parolini, sco inschigner da guaud fiss quai departament probabel stà pli adattà che quel da scola e cultura.

A nus pari donn ch'il departament da construcziun è vegnì bloccà. Quai fiss stà bun per tut ensemen sch'i avess er là dà ina roschada.
Autur: Gian MichaelSchef da fracziun PBD

Per lur cusseglier guvernativ Jon Domenic Parolini, avess la partida burgais-democratica giavischà in auter departament. Però la repartiziun fetschia la regenza e quai saja d'acceptar. Plinavant saja la partida cuntenta ch'i haja dà ina detga roschada.

Jon Domenic Parolini surpiglia l'onn proxim da nov il departament da scola e cultura.

RR novitads 06:00