Siglir tar il cuntegn

Header

cuntegn

PBD e PCD dal Grischun In duo duai manar la partida fusiunada

Las conturas da la nova partida chantunala «Allianza dal Center» vegnan pli e pli cleras. Uschia duai in co-presidi surpigliar la batgetta. Quai communitgeschan la PCD e la PBD. Il Gea definitiv a la fusiun duain ils delegads e las delegadas dar ils 7 da zercladur.

Il presidi sco er la fracziun dal Cussegl grond da la nova partida duai vegnir manà mintgamai dad in duo da PCD e PBD en furma d'in co-presidi e quai fin il 2024. Tgi che vegn a surpigliar il timun, n'è dentant anc betg enconuschent. Plinavant duajan mintgamai dus represchentants dals cristiandemocrats e dals burgaisdemocrats far part al vicepresidi. En quest senn ha la gruppa da project preparà il contract da fusiun da las duas partidas grischunas.

Ils statuts per la nova «Allianza dal Center Grischun» sa basan sin ils statuts da la PCD Grischuna. Quels sajan dentant cumplettamain vegnids surlavurads, scrivan las partidas en ina communicaziun.

Votaziun definitiva ils 7 da zercladur

Ils statuts sco er il contract da fusiun èn actualmain en consultaziun tar differentas delegadas e delegads da la partida. Quels han anc fin ils 6 da matg temp per prender posiziun. Suenter dastgan tut las commembras e commembers prender posiziun davart ina versiun netta dals documents.

Il Gea definitiv ston las delegadas ed ils delegads da la partida dar ils 7 da zercladur. Perquai dovri ina maioritad da trais quarts. Tar in Gea vala la fusiun a partir dad immediat.

La decisiun da principi è crudada gia il november da l'onn passà: En ina retschertga è la gronda maioritad dals commembers e las commembras da la PCD e PBD s'exprimida per fusiunar a la nova partida «Allianza dal Center».

audio
Per tadlar: curt e cumpact
01:08 min, RTR Audio dals 03.05.2021.
laschar ir. Durada: 01:08 minutas.

RTR novitads 21:00

Artitgels legids il pli savens

Scrollar a sanestra Scrollar a dretga