Siglir tar il cuntegn

Header

Kevin Brunold / Aita Zanetti
Legenda: Kevin Brunold ed Aita Zanetti co-presidieschan l'Allianza dal Center. Gian Carlo Candinas
cuntegn

PBD e PCD Zanetti e Brunold co-presidieschan l'Allianza dal Center

La PCD e la PBD èn uss era en il Grischun fusiunadas a la Allianza dal Center, quai han las duas partidas decis il glindesdi saira a chaschun da radunanzas da delegadas e delegads separadas a Landquart.

La PBD ha approvà il contract da fusiun unanimamain, tar la PCD hai dà ina cuntravusch. La fusiun va en vigur immediat.

L’Allianza dal Center dal Grischun ha in co-presidi cun Kevin Brunold ed Aita Zanetti. Quai è vegnì decis a chaschun da l’emprima radunanza da delegads da la partida fusiunada a Landquart.

Aita Zanetti è la vicepresidenta dal Cussegl grond e fin ussa vicepresidenta da la PBD. Kevin Brunold è deputà ed anteriur president da la PCD Grischun.

Sper il co-presidi èn er vegnì occupads ils posts dal vicepresidi. Quai cun Yvonne Brigger-Vogel (Zizers), deputà Alessandro Della Vedova (Cuira), deputà Gian Michael (Donat) e Martina Widmer (Felsberg).

video
PCD e PBD han fusiunà er en Grischun tar l'Allianza dal Center
Or da Telesguard dals 08.06.2021.
laschar ir

Istorgia, differenzas e pussanza

Las duas partidas accentueschan d'avair tematicamain in coc communabel - in sguard en la statistica mussa dentant era differenzas:

Tge che omaduas partidas han communabel: PCD e PBD èn adina puspè stadas confruntadas cun fusiuns e midadas da num.

Ina survista dals eveniments centrals en l'istorgia da la PCD e la PBD - enfin la fusiun
Legenda: Grafica RTR

Surtut sch'ins guarda sin la carta geografica, lura sa mussa anc oz l'istorgia da las duas partidas: Entant che la PCD è ferma en territoris catolics (p.ex. Surselva, Surses) è la PBD sa posiziunada en regiuns refurmadas (p.ex. Engiadina, Partenz).

Carta che mussa nua en il Grischun che la PCD e la PBD èn fermas
Legenda: Grafica RTR, funtauna PCD/PBD

La nova partida «Allianza dal Center» influenzescha era la pussanza en il Cussegl grond: La Partida liberaldemocratica PLD n'ha betg pli las pli bleras deputadas deputads.

Questa proporziun da las partidas pudess dentant sa midar cun las elecziuns grischuna dal matg 2022: Lura elegian Grischunas e Grischuns probabel lur represchentantas e represchentants en il Cussegl grond cun il sistem dal proporz dubel (sch'il suveran di Gea en la votaziun dals 13 da zercladur). Il politolog Clau Dermont ha fatg ina calculaziun per RTR:

RTR novitads

Artitgels legids il pli savens

Scrollar a sanestra Scrollar a dretga