Siglir tar il cuntegn
Inhalt

Chantun PBD GR – Cun cuntinuitad e novas, frestgas forzas en l’avegnir

Tenor il nov-elegì president Beno Niggli dovria la partida uss tranter auter temp per trair suenter forzas giuvnas. La radunanza da delegads ha elegì il pur da Grüsch, Beno Niggli sco nov president da la Partida burgais-democratica dal Grischun.

ina dunna e dus umens stattan in sper l'auter e laschan far ina fotografia
Legenda: Da san.: Aita Zanetti da Sent, vicepresidenta, Beno Niggli il president e Christian De Tann il segund vicepresident. RTR, Gion Gieri Flepp

Fin uss era el president ad interim suenter che l’anteriur president, Andreas Felix, aveva dà giu l'avrigl passà tut ses posts en la partida pervi da l'affera dal cartel en la branscha da construcziun. Andreas Felix è vinavant commember da la PBD ma senza uffizis entaifer la partida.

Beno Niggli, l’um da 59 onns, vesa sasez sco quel che po ussa dar a la partida la cuntinuitad e la stabilitad cun sia experientscha politica en in team giuven e frestg. Qua manegia el tranter auter ils quatter novs a la testa da la partida: Aita Zanetti da Sent sco emprima vicepresidenta, il president dal Mesauc, Christian de Tann sco segund vicepresident ed ils dus novs deputads dal Cussegl grond Ursin Widmer da Favugn e Martin Bettinaglio da Claustra-Serneus. Beno Niggli è lura er persvas ch’el po il pli tard en quatter onns dar vinavant ses post ad in dals politichers giuvens.

Politica a mez duai purtar al success ed attenziun

Il nov-elegì president vul augmentar il dumber da commembers da la PBD da sutensi. En l’emprim pass sin livel communal e regiunal, lura chantunal e naziunal. Quai cun ina politica amez. Quella na saja betg simpla perquai ch’ins stoppia adina puspè declerar pertge ch’ins è ina giada persuenter e l’auter encunter. Ma sin livel naziunal vesa il bab da quatter uffants che la partida pudess lura era cun paucas vuschs adina puspè esser decisiva. Quai purtass attenziun e lura il success, è el persvas.

Uss giaja quai però er per far attent la glieud sin la buna lavur ch’els fetschian en il Cussegl grond ed er sin il palc naziunal. Finamira è da tegnair almain in sez en la regenza grischuna, acquistar a lunga vista puspè in segund e gudagnar en quatter onns in u dus sezs en il Cussegl grond. Sin livel naziunal vulan els defender il sez da cusseglier naziunal Duri Campell. En quest connex hajan els tenor Beno Niggli emprendì da betg cumenzar cun il cumbat electoral memia baud. Quai unfiseschia la glieud. Els vegnian plitost a far curt e bun e probabel pir a cumenzar l’avrigl 2019. Tut en tut è Beno Niggli da l’avis che la partida saja uss cun las bleras forzas giuvnas e frestgs gia puspè levada en pè cun ina chomma suenter l’onn turbulent 2018.

RR actualitad 07:00