La stagiun da skis è a fin per immediat. Per bleras pendicularas in mais pli baud che previs. Quai haja consequenzas massivas per las pendicularas en il Grischun, di Martin Hug.
Impurtant è che las pendicularas èn bunas da pajar lur quints, las pajas e da pudair introducir spertamain e cun pauca birocrazia lavur curta.
Qua sajan dumandads il chantun, la branscha e la confederaziun. Martin Hug intuna dentant, che las pendicularas hajan encletga per la decisiun da la regenza grischuna. Ins vesia la responsabladad per la populaziun e stoppia uss star ensemen e far il meglier or da questa situaziun.
Consequenzas massivas era per la gastronomia
In meter distanza tranter las maisas, quatter meters quadrat spazi per giast, mesiras pli severas d'igiena. Mo sut questas premissas pon ustarias anc esser avertas davent da sonda saira, ils 14 da mars, las 17:00h.
In local cun 60-70 plazzas ha uss anc plazza per 30, perquai essan nus leds ch'i dà la pussaivladad d'annunziar per immediat lavur curta.
Las mesiras sajan in grond tagl per la branscha e bleras pitschnas ustarias hajan tema per lur existenza, di Caluori. Perquai emprovian els sco uniun da sustegnair quels uschè bain sco pussaivel, ensemen cun il sustegn annunzià dal chantun.
RTR actualitad 08:00