Las pendicularas dal Grischun han fatg 23% damain svieuta tranter l'entschatta da la stagiun e la fin da l'onn, cumpareglià cun ils ultims dus envierns. Er il dumber da giasts è sa reducì per 17%. Quai surtut pervi da las restricziuns en connex cun corona. Las pendicularas han dastgà vender be 70% dals bigliets per evitar fullas da glieud.
Malgrà la perdita sajan las pendicularas cuntentas dad avair pudì laschar avert ils territoris da skis. Ils giasts sajan er sa tegnids cun disciplina vid ils concepts da protecziun, di il president da las pendicularas Martin Hug envers RTR. «Tgi che ha vulì ir cun skis è er sa tegnì vid las reglas.» Discussiuns pervì da mascras haja quai be dà en paucs singuls cass, ed er da star en colonna sche quai ha dà colonna hajan ins pudì tegnair las persunas cun agid da «rangers» da covid sin distanza.
En general damain giasts en territoris da skis svizzers
Plirs territoris da skis svizzers han registrà damain giasts sur las Festas cumpareglià cun ils onns avant. Uschia eran per exempel dapi Silvester 6’000 fin 7’000 persunas mintga di sin il Flumserberg en il chantun Son Gagl. Quai saja var 1/5 damain ch’en auters onns, ha ditg il schef da las pendicularas.
Era 1/5 damain giasts sur las Festas eran en il territori da skis dad Adelboden Lenk, en l’Oberland Bernais, uschia in pledader.
