Las Pendicularas svizras lavuran anc vid in concept da protecziun pervi dal coronavirus per la stagiun d'enviern. Quel vul l'organisaziun tetgala preschentar pli tard l'emna che vegn. Intgins territoris da skis han però gia preparà tschertas mesiras. Quellas sa basan da principi sin il concept da la stagiun da stad.
audio
Pendicularas: Concepts da segirtad per stagiun d'enviern
ord Actualitad dals 02.10.2020.
laschar ir. Durada: 3 minutas 11 Secundas.
Las ideas e mesiras concretas preschentan las pendicularas sin lur paginas d'internet. Resumà vala il suandant:
- Obligatori da mascras en pendicularas serradas: Quel obligatori vala schon uss. Sin sutgeras e lifts averts na datti dentant nagin obligatori ed er nagina limitaziun da sezs.
- Mascras da skis empè da mascras d'igiena: Intginas pendicularas – per exempel Cuira, Tavau u San Murezzan – vulan porscher en lur butias ina mascra da skis che protegia cunter virus. Quellas duain evitar, ch'ins sto adina puspè prender giu la chapellina per metter si ina mascra.
- Dapli maisas e sutgas en il liber: En ils restaurants valan las reglas da la branscha da gastronomia – pia er reglas da distanza tranter maisas. Per porscher tuttina avunda maisas en ils restaurants vulan intginas pendicularas crear dapli plazzas da mangiar en il liber.
- Pauc u ina autra furma dad après-ski: Intgins territoris, sco per exempel Scuol u Andermatt-Sedrun, han ditg sin dumonda, ch'els èn en tschertga d'alternativas per il après-ski, sco ch'ins enconuscha el. Après-ski sco fin uss na datti probablamain en blers lieus betg.
- Garanzia per cartas: Malgrà tut las mesiras: il chantun u la Confederaziun pon tuttina serrar territoris da skis – tut tenor situaziun epidemiologica. Intginas destinaziuns porschan bunificaziuns u er ina garanzia per cartas da stagiun u da plirs dis. Per ils dis serrads vegnan scrit buns dis u perfin pajà enavos ils daners.