En noss chantun survegnan actualmain 10 anteriurs magistrats mintg'onn ensemen 935'000 francs. Auters chantuns enconuschan generusas indemnisaziuns unicas u rentas limitadas.
Tant dattan ils chantuns or per magistrats en renta
| Chantun | Sistem | Dumber da persunas | Custs totals |
| Tessin | Renta a vita duranta | nagina indicaziun | 4,04 milliuns |
| Vad | Renta a vita duranta | 18 | 2,5 milliuns |
| Genevra | Renta a vita duranta | 18 | 2,27 milliuns |
| Friburg | Renta a vita duranta(midada decidida) | 21 (inclus vaivas) | 2,16 milliuns |
| Neuschatel | Renta a vita duranta | nagina indicaziun | 2 milliuns |
| Argovia | Indemnisaziun limitada | 17 (inclus vaivas) | 1,97 milliuns |
| Giura | Indemnisaziun limitada (dapi il 2017) | 15 | 1,45 milliuns |
| Son Gagl | Indemnisaziun limitada | 13 | 1,4 milliuns |
| Berna | Renta a vita duranta u indemnisaziun limitada | 8 | 1,4 milliuns |
| Vallais | Nagina indemnisaziun (dapi il 2015, avant renta limitada) | 12 | 1,13 milliuns |
| Sutsilvania | Indemnisaziun limitada (dapi il 2018) | 23 | 1,06 milliuns |
| Grischun | Renta a vita duranta | 10 | 935'000 |
| Uri | Indemnisaziun limitada (dapi il 2000) | 10 | 740'000 |
| Sviz | Renta a vita duranta | 19 (inclus vaivas) | 540'000 |
| Turgovia | Indemnisaziun limitada | 3 | 388'000 |
| Sursilvania | Nagina indemnisaziun (dapi il 2019, avant indemnisaziun limitada) | 8 | 310'000 |
| Soloturn | Indemnisaziun limitada | 1 | 157'000 |
| Appenzell Dadora | Indemnisaziun limitada | 2 | 153'000 |
| Basilea-Champagna | Indemnisaziun limitada | 0 | 0 |
| Zug | Indemnisaziun limitada | 0 | 0 |
| Schaffusa | Indemnisaziun limitada | 0 | 0 |
| Glaruna | Indemnisaziun limitada | 0 | 0 |
| Turitg | Indemnisaziun limitada | nagina indicaziun | nagina indicaziun |
| Basilea-Citad | Indemnisaziun limitada | 1 | nagina indicaziun |
| Appenzell Dadens | Indemnisaziun limitada | nagina indicaziun | nagina indicaziun |
| Lucerna | Indemnisaziun limitada | nagina indicaziun | nagina indicaziun |
| Confederaziun | Renta a vita duranta | 23 (inclus 4 chanzeliers federals e 2 vaivas) | 4,4 milliuns |
Er il politicher dispitaivel Pierre Maudet profitescha
Malgrà che sia atgna partida fa squitsch a Pierre Maudet da dar giu ses post sco cusseglier grond, resta el en uffizi. Uss vegn il politicher da Genevra recumpensà. A partir dad ier, sonda è el otg onns en uffizi. Perquai ha el uss il dretg da survegnir ina renta da 7'430 francs il mais – per vita duranta. Sch'el avess chalà avant avess el survegnir in'indemnisaziun unica da 437'802 francs, ha declerà ina pledadra da la direcziun da finanzas a la Sonntagszeitung.
Divers chantuns han scursanì las indemnisaziuns
Il Vallais, Berna e Basilea Citad han dentant scursanì da curt las indemnisaziuns e Friburg ha abolì las rentas per vita duranta. En futur duain ils magistrats survegnir las medemas prestaziuns sco auters collavuraturs dal chantun or da la cassa da pensiun. Il chantun Berna scursanescha lur prestaziun da renta sin trais onns. Ed er en il chantun Basilea Citad datti ussa be pli per trais onns empè da 10 onns prestaziuns finanzialas.
RR novitads 06:00