En il tschintgavel scrutini è Thomas Aeschi stà il concurrent da Heinz Brand per daventar successur da cussegliera federala Eveline Widmer-Schlumpf. Thomas Aeschi è ì cun la plima. Er Guy Parmelain dal chantun Vad e Norman Gobbi dal Tessin èn vegnids nominads da la Partida populara svizra sco candidats per il Cussegl federal. Heinz Brand suppona, ch'ils collegas da la PPS na vulevan betg puspè in Grischun en il cussegl federal. Ultra da quai saja ses concurrent Aeschi in candidat fitg qualifitgà, agiunta Brand. Tar la teoria che Thomas Aeschi, il protegì da Christoph Blocher, haja survegnì dapli vuschs or da «l'ala da Blocher» di Brand, che quai sajan be speculaziuns.
Aeschi, il nov favurit?
Suenter che Brand che valiva sco favorit n'è betg pli en la cursa per il Cussegl federal, vegn era gia speculà tgi ch’è il nov favurit. Tenor Heinz Brand ha Thomas Aeschi las meglieras schanzas. Dentant possia senz'auter er dar ina cursa testa a testa tranter Aeschi e Guy Parmelin. Parmelin saja in politicher dal center dretg, Aeschi cleramain in politicher da la dretga. E: Thomas Aeschi vegnia er valità sco persuna fitg datiers da Christoph Blocher, quai che saja per blers parlamentaris in motiv da betg eleger el.
Al candidat dal Tessin Norman Gobbi na dat Brand betg grondas schanzas. Bain vegnia il parlament ad attestar al Tessin il dretg d’avair in represchentant en la regenza Svizra, dentant «quella giada n'è la constellaziun betg uschia, ch'in’elecziun da signur Gobbi è probabla», di Heinz Brand.
Parlamentaris avessan gugent gì in Grischun
Er sch’in cusseglier ni ina cussegliera federala grischuna na sappia betg directamain prender influenza sin il Grischun, saja per ils parlamentaris a Berna meglier da sa chattar cun in'atgna persuna. Quai di il cusseglier dals chantuns da la PCD Stefan Engler. Er il cusseglier naziunal da la PCD Martin Candinas deplorescha, che Brand n'è betg vegnì nominà. «Jau avess dà mia vusch a Heinz Brand», di Candinas.
Sco grischun saja quai impurtant dad er promover Grischuns per posts impurtants, saja quai en la politica sco er en auters champs. Dals trais candidats na saja nagin datiers da las regiuns. Il Grischun dovria dentant persunas che hajan chapientscha per las regiuns da muntogna e per minoritads, di Candinas. Er tenor Heinz Brand, che dastga uss er eleger ils 9 da december in candidat empè da spetgar sin in agen resultat, na sajan nagin dals trais candidats nominads da la PPS specialmain adattàds per il chantun Grischun.
Tgi che survegn la fin finala ils 9 da december la vusch dals parlamentaris grischuns è pia anc fitg avert. Ubain sco la cussegliera naziunala da la partida socialdemocratica Silva Semadeni di: «Enfin ils 9 da december poi anc capitar bler».