Cun rinforzar la politica chantunala d'uffants e giuvenils, vul la regenza stgaffir meglras cundiziuns da viver per famiglias, uffants e giuvenils. Quest svilup capita entaifer il chantun sur plirs departaments ed en collavuraziun cun vischnancas, acturs privats sco er famiglias. Mesiras concretas sa dattan or da l'analisa fatga l'onn passà. Analisà han ins l'inventari ed ils basegns en il sectur da la promoziun, protecziun e participaziun. Previs èsi da realisar projects il 2021 e 2022.
Maletg directiv
Cun agid dal maletg directiv hajan ins gia pudì realisar intginas mesiras fundamentalas. Il maletg directiv saja la basa per tut ils acturs e las acturas ch'èn activs en la politica d'uffants e giuvenils en il chantun, scriva la regenza. Uschia duai vegnir garantì in agir structurà, consistent e persistent.
Link tar il chantun
Proxims pass
In team da project lavura per il mument vid l'elavuraziun d'ina strategia chantunala davart il tema «promoziun tempriva». Il team è mess ensemen da diversas persunas dal fatg dal chantun or da las spartas furmaziun, sanadad e social sco er da represchentantas e represchentants or da las vischnancas.