Siglir tar il cuntegn

Header

video
Schluccadas en chasas d'attempads
Or da Telesguard dals 03.03.2021.
laschar ir. Durada: 1 minuta 45 Secundas.
cuntegn

Per persunas vaccinadas Mesiras vegnan schluccadas en chasas d'attempads e da tgira

Las regulaziuns da visita en las chasas d’attempads e da tgira vegnan schluccadas. Quai ha decis l’Uffizi da sanadad. Concret na stoppian cussadentas e cussadents che sajan vaccinads cunter il coronavirus betg pli purtar mascrinas entaifer la chasa. Plinavant vegn abolida la quarantina da contact per els. Visitaders stoppian percunter vinavant purtar mascrinas e deponer lur datas da contact.

Actualmain sajan passa 80% da tut ils cussadents e las cussadentas da chasas d’attempads e da tgira vaccinads duas giadas cunter corona. Las abitantas ed ils abitants ch'èn betg vaccinads ston s'inscuntrar per visitas en lur chombras, en ils manaschis da restauraziun da la chasa u ordaifer la chasa. Plinavant ston quels abitants e quellas abitantas purtar ina mascrina e sa tegnair vid las mesiras da distanza. Entradas novas ston anc adina ir en quarantina. En cas d'in test negativ pon ils cussadents e las cussadentas terminar la quarantina suenter set dis.

audio
Per tadlar curt e cumpact
ord RTR Audio dals 03.03.2021.
laschar ir. Durada: 55 Secundas.

Raschun per questas schluccadas è che la strategia da vaccinar e da testar funcziunia bain en il chantun. Dapi l'entschatta favrer n'hai dà naginas novas infecziuns pli cun il coronavirus en chasas d'attempads e da tgira.

RTR novitads 11:00

Artitgels legids il pli savens