Auter che pli baud na vegnan ils perdents da votaziuns betg simplamain emblidads – na, i vegn discutà cun els co i duai ir vinavant. Qua saja la tenuta schon sa midada in zic, manegia Andreas Glaser il directur dal center per democrazia. Ins na dastgi dentant betg emblidar ch'i valia la finala quai che la maioritad decida.
Dependa da la votaziun
I dependia dentant er dal tema da la votaziun. Per exempel tar las duas votaziuns federalas «fair-food» e «suveranitad alimentara» nua ch'i è ì per l'agricultura. L'agricultura è in tema fitg vast nua ch'i dat adina puspè iniziativas ni decisiuns ch'ins sto prender.
Auter saja quai tar l'iniziativa Grischuna da linguas estras. Cun il resultat da quella stoppan ins ir enturn pli rigurus. Grad er perquai che las minoritads rumantschas e talianas hajan chattà ensemen cun regiuns tudestgas ina maioritad. Vitiers vegnia er anc ch'i na dettia per la politica nagina obligaziun da prender mesiras en favur da la minoritad tar ina votaziun. I saja plitost in cumond da la logica politica dad er tadlar sin quellas vuschs, uschia Andreas Glaser. La finala saja dentant uschia ch'ils perdents stoppian magari er acceptar ina decisiun clera da la maioritad e na betg trair vinavant quella cun discussiuns en perpeten.
RR actualitads 17:00