Siglir tar il cuntegn

Header

Duas persunas tegnan in placat per far attent sin la tgira
Legenda: Sindicats e represchentats da la tgira han fatg attent sin lur pretensiuns avant il bajetg dal Cusssegl grond. RTR
cuntegn

Persunal da tgira Regenza na duai betg intermediar in contract collectiv

Lavurants e patruns duain sezs negoziar davart in contract collectiv per il persunal da tgira – quai na saja betg chaussa da la regenza grischuna. Il Cussegl grond ha refusà ina proposta da la fracziun socialdemocratica.

Sindicats e patruns na vegnian gia dapi onns betg da sa cunvegnir, han argumentà ils socialdemocrats. Gist la crisa da corona haja mussà l'impurtanza dal persunal da tgira. I na tanschia betg da far applaus sin lautga, ha accentuà la deputada e presidenta da l'Uniun dal persunal da tgira Renate Rutishauser (PS):

audio
Renate Rutishauser: Dapli che applaus
00:30 min, RTR Audio dals 22.10.2020.
laschar ir. Durada: 00:30 minutas.

Passa 50% da tut ils emploiads en Svizra hajan in contract collectiv e las branschas sajan cuntentas, uschia il president da la PS Philipp Wilhelm:

audio
Philipp Wilhelm: Gist la tgira n'ha nagin GAV
00:36 min, RTR Audio dals 22.10.2020.
laschar ir. Durada: 00:36 minutas.

La regenza sco era insaquantas deputadas han bain gì simpatia per in contract collectiv, èn dentant sa dustads cunter in'intervenziun da la regenza.

Era sa dustads èn represchentants da chasas da tgira: In GAV restrenschia las libertads da las instituziuns e na schlia insumma betg la mancanza da persunal. Quai ha per exempel il mainafatschenta dal Center da sanadad Puntreis a Mustér, Diego Deplazes (PCD), fatg valair:

audio
Diego Deplazes: In GAV na schlia betg problems
00:32 min, RTR Audio dals 22.10.2020.
laschar ir. Durada: 00:32 minutas.

La vicepresidenta da la Fundaziun Flury e deputada da la PLD, Anna-Margreth Holzinger è sa dustada cunter la pretensiun che las cundiziuns da lavur en la tgira sajan uschè nauschas:

audio
Anna-Margreth Holzinger: I dat reglas
00:28 min, RTR Audio dals 22.10.2020.
laschar ir. Durada: 00:28 minutas.

La finala ha il Cussegl grond acceptà ina varianta pli flaivla: La regenza duai periodicamain evaluar la situaziun en la branscha e sche necessari proponer mesiras cunter la mancanza da persunal en il sectur da tgira.

Il dilemma da Peter Peyer

Il cusseglier guvernativ Peter Peyer ha sco usità defendì la posiziun da la regenza. Tar quest tema è quai dentant stà in zic spezial, perquai ch'el era avant sia elecziun en la regenza sindicalist. «Questa debatta ma regorda vid mia vita passada», ha el constatà cun in surrir.

Durant la debatta èsi vegnì a la situaziun extraordinaria ch'il deputà Urs Marti (PLD) ha pledà per in'intervenziun da la regenza per cuntanscher in contract collectiv - entant ch'il minister da sanadad da la PS ha (stuì) pledar cunter:

audio
Peter Peyer recumonda co votar
00:20 min, RTR Audio dals 22.10.2020.
laschar ir. Durada: 00:20 minutas.

Acziun da protest

Avant il bajetg dal Cussegl grond èn represchentants da «l'Allianza da tgira» sa postads ed han repartì fegls sgulants per far attent sin lur pretensiuns. E quellas èn:

  • in contract collectiv per il persunal da tgira
  • ina premia da corona dad almain ina paja dal mais per il stress extraordinari
  • dapli dretgs e dapli protecziun al plaz da lavur
  • meglras cundiziuns da lavur

RTR novitads 17:00

Artitgels legids il pli savens

Scrollar a sanestra Scrollar a dretga