Siglir tar il cuntegn

Header

cuntegn

Chantun Peter Engler è nov president da la cuminanza d'interess turissem

La cuminanza d’interess turissem en il Grischun ha in nov president. Peter Engler, il CEO da las pendicularas da Lai è vegnì elegì a la radunanza generala sco nov president. Il presidi n'è betg la suletta midada tar la cuminanza d’interess turissem Grischun.

La midada dal presidi n'è betg la suletta midada tar la cuminanza d’interess turissem Grischun. Perquai ch’intgins commembers n’eran betg cuntents cun la situaziun da la cuminanza d’interess turissem ITG. Ina gruppa da lavur ha elavurà novs statuts e proponi novs commembers per la suprastanza.

Nova suprastanza

La ITG ha gì el passà adina puspè conflicts d’interess. Memia bleras gruppas han fatsch part a la suprastanza ed cumbattà per lur interess. Uschia n'ha la cuminanza d'interess betg pudì preschentar schliaziuns che correspundevan a tuts. Ina gruppa da lavur ha proponì novs commembers da las grondas gruppas. Unanim èn Franz Sepp Caluori (president da Gastro Grischun), Silvio Schmid (president da Pendicularas Grischun), Ernst Wyrsch (president hotelleriesuisse Grischun) e Marcel Friberg (Grischun Vacanzas) vegnids elegids.

Dus commembers èn anc pendents. Els vegnan elegids anc quest onn. La suprastanza è vegnida pli schlanca. Ils commembers represchentantan da las grondas branschas. Represchentants dals purs u dals impressaris na fan betg part pli.

audio
Saira: Cuminanza da turissem cun strategia nova
ord Actualitad dals 18.11.2015.
laschar ir. Durada: 2 minutas 17 Secundas.

Novs statuts

La gruppa da lavur ha decidì novas finamiras per la cuminanza d’interess. Ella duess sensibilisar la populaziun per il turissem, coordinar la communicaziun, optimar las cundiziuns per il turissem e la furmaziun dad ina rait cun politica, medias e societad.

La cuminanza d’interess ha in problem d’image, di il nov president Peter Engler. Las davosas votaziuns na sajan betg vegnidas acceptadas dal suveran, per exempel la lescha davart las taxas turisticas u la canditatura per il Gieus olimpics 2022. Quai stoppia sa midar.

Per realisar las finamiras duess en futur in club da turissem sa gidar. A quest club duessan maximal 20 deputads dal Cussegl Grond far part, che s’engaschan a favur dal turissem. Uschia duess vegnir fatg pli intensiv lobbying per il turissem grischun. Era ils novs statuts èn vegnids elegids unanim a la radunanza generala.

Artitgels legids il pli savens