Siglir tar il cuntegn
Inhalt

Chantun Plaschair tar ils hoteliers grischuns: + 5,4% tar pernottaziuns

Uschia fan las destinaziuns grischunas il 2018 en media 5,4% dapli pernottaziuns che anc en la medema perioda da l’onn avant. Quai resulta da las cifras da l'Uffizi per economia e turissem dal Grischun.

Legenda:
Pernottaziuns en Grischun: Cliccar sin ils onns per activar e deactivar las lingias per cumparegliar las pernottaziuns da differents onns. ORIGINAL Quai è il diagram cun tut las cifras - mo duvrar per retschertgas Cifras da l'Uffizi federal da statistica (2005-2018)

Il Grischun realisescha cun il plus 5,4% las quart-meglras cifras da tut las 13 regiuns da turissem svizras evaluadas. Il pli grond plus ha fatg il Vallais cun +7,5%, seguì da la regiun da Lucerna e Lai da las Quatter Chantuns cun + 6,8% e la regiun da Basilea cun + 6,4%.

Grischun: per 15 da 18 lieus cifras positivas il 2018

En Grischun han fatg da las 18 destinaziuns enumeradas en la statistica chantunala 15 in plus lev (p.ex. Mustér Sedrun + 0,6%; Partenz e Surselva +2,1% enfin in plus marcant (Val Son Pieder +26,5%; Signuradi +24,8% e Lai 14,4%).

In minus han stuì prender en consegn las destinaziuns Bregaglia Engiadina cun -37,7%, Bravuogn Filisur cun -1,4% e San Bernardino, Mesolcina/Calanca cun -1,1% pli paucas pernottaziuns.

Er hoteliers svizzers han raschun dad esser cuntents

Dapertut en Svizra haja dà da schaner enfin mars dapli pernottaziuns da giasts: En total ha la hotellaria svizra registrà 9,3 milliuns pernottaziuns. Quai èn 5% u 424'000 pernottaziuns dapli che l'onn passà.

Sco quai che l'Uffizi federal da statistica communitgescha van 4,6 milliuns pernottaziuns sin il quint da giasts svizzers e 4,8 milliuns pernottaziuns sin il quint da giasts da l'exteriur.

RR novitads 10:00