A la procura publica dal Grischun mancan quest onn radund 2,65 milliuns francs. Raschun principala: pli paucas entradas che budgetà. Per cuvrir quai dumonda la procura publica il Cussegl grond in credit supplementar da 1,9 milliuns francs.
Sco quai che l'emprim procuratur public Claudio Riedi ha ditg al schurnal regiunal dal SRF saja il motiv principal probabel la pandemia. Pli pauca glieud era sin via ed uschia haja dà quest onn radund 3'000 (u radund 20%) denunzias e mandats penals pli pauc cumpareglià cun ils ultims onns.
Pli paucas pendenzas
La situaziun haja dentant er ina buna vart: Entras la pli pauca lavur, hajan ins er pudì lavurar giu pendenzas. Er cas cumplitgads e cumplex hajan ins pudì finir. Fertant ch'ins haja gì il settember 2019 1'914 pendenzas, han ins gì la fin settember 2020 be pli 1'425 pendenzas. Uschia saja il squitsch anc adina grond, ma pli supportabel.