Il cudeschet da votaziun per la proxima votaziun chantunala dals 13 da zercladur cumpara en in nov vestgì. Ils votants e las votantas duain grazia al nov layout ed al linguatg pli simpel pudair furmar pli svelt ina atgna opiniun.
In chapitel curt ed in detaglià
A la lectura u al lectur che ha prescha vegn da nov preschentà en in'emprima part mintga project en furma concisa sin ina pagina dubla – quai sut il titel «Curtamain».
Las explicaziuns da votaziun dal chantun
Tgi che vul infurmaziuns pli detagliadas davart l'object da votaziun, chatta quellas en la part principala sut il titel «Detagls». En quest chapitel vegnan explitgads pli precis l'intent e las consequenzas dals projects. Dasper las recumandaziuns da votaziun cumpiglia quest chapitel er ils arguments dal Cussegl grond ed eventualmain er dal comité d'iniziativa u referendum.
Explitgà ils projects en ina lingua pli simpla
Be in nov layout na bastia dentant betg per far pli chapibels ils projects da votaziun, scriva la Cumissiun da redacziun. La nova broschura è perquai er vegnida formulada en ina lingua pli simpla e betg pli en lingua administrativa. Ils temas complexs vegnan uschia explitgads en moda e maniera che mintga votant e votanta po chapir quels.
Las explicaziuns per la votaziun chantunala dal pievel dals 13 da zercladur 2021 cumparan ussa per l'emprima giada en il nov vestgì. A partir dals 17 da matg 2021 tramettan las vischnancas las explicaziuns a las votantas ed als votants.
