Siglir tar il cuntegn

Chantun Plievgia fa anc pli precara la situaziun

En il Grischun vala privel da lavinas stgalim 4 u schizunt stgalim 5, il privel da lavinas il pli aut. Quai munta che lavinas pon er vegnir spontan a val. Las proximas uras èsi vinavant da quintar cun naiv sin ils auts e plievgia en las vals.

Tabla cun via serrada.
Legenda: En il Grischun vala privel da lavinas stgalim 4 u schizunt stgalim 5. Keystone

En il Grischun èn diversas vias e tschancuns da tren per il mument serrads. Il privel da lavinas è simplamain memia aut. En il nord vala schizunt privel da lavinas stgalim 5, il pli aut stgalim. Là èsi uschia che grondas lavinas spontanas pon vegnir fin giu en las vals, uschia Gian Darms da l'institut per naiv e lavinas a Tavau. Perquai èsi er impurtant da resguardar quai ch'ils servetschs da lavinas locals han dà ora. Quai per exempel areguard vias serradas u evacuaziuns.

I naiva e plova vinavant

Tenor Felix Blumer dad SRF Meteo plova e naiva vinavant. Cunzunt èn l'aut poi anc ina giada dar 10 fin 50 centimeters naiv nova fin damaun marvegl. Il cunfin da naiv po dentant s'auzar. Nua e quant fitg na saja dentant betg pussaivel da dir, uschia Felix Blumer. I vegnia bain aria chauda nà dal vest, co quella sa repartia en las valladas grischunas na saja betg pussaivel da dir. Uschia ch'el na sappia er betg dir, nua ch'i plovia.

La plievgia fa la situaziun anc pli precara

La plievgia fa pli greva la naiv uschia ch'i dat anc dapli paisa sin la naiv ch'i quai ch'ha gia entras la naiv nova. Uschia vegn la situaziun da lavinas anc pli precara, uschia Gian Darms. Cunquai ch'i chala tenor SRF Meteo dentant da plover e naiver damaun marvegl sa quietescha lura er la situaziun da lavinas puspè. La situaziun per sportists da naiv resta dentant delicata, Gian Darms avertescha da bandunar ils proxims dis las pistas segiradas.

Strusch da cumparegliar cun il 1999

La situaziun actuala saja bain precara, dentant betg da cumparegliar cun l'enviern da lavinas 1999. L'institut per naiv e lavinas a Tavau ha cumpareglià las autezzas da naiv actualas cun quellas da la fin favrer 1999. E sulet tar las staziuns en il Grischun dal nord èn las autezzas sumegliantas a quellas dal 1999. En il rest dal chantun èn ins dentant lunsch davent da las autezzas da l'enviern da lavinas 1999.

RR actualitad 12:00

Ord l'archiv