Siglir tar il cuntegn

Chantun Plievgia intensiva vegn pir

La situaziun da l’aura da las ultimas 24 uras è sa sviluppada sco spetgà. En las regiuns Surselva, Valragn e Mesauc hai dà intensiva plievgia a partir da mesanotg sin la gievgia. Qua èn vegnidas mesiradas quantitads d'aua enturn 50 mm (50l/m2). Donns hai però anc dà nagins.

Legende: Video Privels tras malaura en Grischun abspielen. Laufzeit 01:36 Minuten.
Or da Telesguard dals 16.06.2016.

La situaziun da l'aura en il Grischun è sa sviluppada sco spetgà las davosas 24 uras. En las regiuns nua ch'igl era vegnì avertì da blera plievgia sco la Surselva, il Valragn ed il Mesauc plovi intensivamain dapi ier notg.

Fin ussa han ins registrà enturn 50 millimeters. Quai communitgescha l'Uffizi chantunal per privels da la natira. Rapports davart donns na datti fin ussa betg. La fasa la pli intensiva spetg’ins dentant pir per questa saira e la notg sin venderdi. Gia la mesemna aveva l’Uffizi federal per ambient avertì d'inundaziuns e bovas.

Previsiun per gievgia saira e venderdi

  • Fin il venderdi a las 08:00 èsi da quintar cun ferma plievgia. Pertutgadas en cunzunt las regiuns alpinas dal Gottard sur la Surselva fin il Valragn.
  • Totalmain po quai dar quantitads d’aua tranter 80 e 120 mm. Eventualmain sa sbassa il cunfin da naiv en las regiuns cun la plievgia la pli intensiva sin radund 1’500 meters sur mar.
  • Pervi da l’aura bletscha da las ultimas emnas e la cumbinaziun cun la marschauna èn ils terrens gia saturads fitg. Uschia po quai tras la plievgia dar sbuvadas e bovas.
  • Las vischnancas ch’èn probablamain pertutgadas èn gia vegnidas avertidas la gievgia da sa preparar per eventuals donns. Quests avertiments e recumandaziuns da cumportament, il link avra en ina nova fanestra valan vinavant.

Igl è da quintar cun bovas ed inundaziuns

Sco quai che cusseglier guvernativ Christian Rathgeb ha ditg avant il Cussegl Grond, saja la situaziun da prender serius. Rathgeb ha però er punctuà ch'i na dettia nagina raschun da panica.

La mesemna era vegnida annunziada plievgia intensiva per la Cadi, la Foppa e la Lumnezia, lura Val S. Pieder, Valragn e Mesauc, plinavant la Val Schons, la Tumleastga e la Vallada dal Rain da Cuira.

RR novitads 15:00++