En general sustegn la gruppa las stentas dal chantun da porscher lavur als fugitivs enstagl d’agid social, uschia dettia quai in tschert svilup positiv en la politica d’asil chantunala. Dimoras per requirents d’asil sutteranas sajan dentant sulet ina soluziun intermediara, scriva la gruppa independenta. Ma la gruppa d’observaziun «FokusAsylGR» pretenda da tractar pli uman e realistic ils uschenumnads «Sans Papiers».
Chattar soluziuns per fugitivs da la Siria e l’Afghanistan
«FokusAsylGR» vesa in problem eminent da porscher alloschis e cussegliaziun en ils cas da Dublin. La gronda part da quests fugitivs èn oriunds da la Siria ni l’Afghanistan e na pon betg vegnir tramess enavos en lur pajais d’origin. Il mument vegnan quests fugitivs sulet vegnir tgirads cun in reschim d’urgenza e betg cun il standard normal en centers da transit. A quests fugitivs vegn refusà il sustegn d’integraziun.
Vinavant pretenda la gruppa d’observaziun en general in tractament pli uman cun ils fugitivs. Surtut las structuras d’agid d’urgenza a Flüeli Valzeina duajan vegnir megliuradas.