Cun l'entschatta dal nov onn da scola èn vegnids constatads dus cas da corona en las scolas da Cuira: In tar ina studenta da la scola media spezialisada ed in tar la scola d’economia KV. Quai rapporta il schurnal regiunal da RSI.
Tar il cas a la scola media spezialisada èn 17 persunas da contact en quarantina, 6 scolaras e scolars. Il contact ha giu lieu ordaifer da la scola, hai num dal chantun. Tar la scola sezza na dovria naginas mesiras supplementar, la scola spezialisada haja in strict concept da protecziun.
Tar il cas tar la KV Cuira han 12 persunas da contact stuì ir en quarantina, 8 scolaras e scolars. Pervia ch'i na dat nagin obligatori da purtar mascrinas tar la scola è l'entira classa cun total 19 scolaras e scolars e 3 scolasts vegnida testada. Ils resultats n'èn anc betg enconuschents.
Cifras da corona
Glindesdi ha il chantun annunzià naginas novas infecziuns cun il coronavirus en il chantun. Actualmain sa chattan 178 persunas en quarantina, 29 en isolaziun ed ina en ospital.
Per il rest da la Svizra ed il Principadi da Liechtenstein, ha il BAG annunzià 157 cas. Dumengia eran quai anc 276, sonda 295 e venderdi 306. En total ha la Svizra nudà dapi 'entschatta da la pandemia 40'060 cas confermads.
