Siglir tar il cuntegn
cuntegn

Chantun Plus 6% – la stagiun da skis ha cumenzà bain en il Grischun

Il december han las pendicularas Grischunas gì var 6% dapli giasts che l'onn passà. Surtut suenter ils 24 da december sajan stads blers giasts sin las pistas, scrivan las pendicularas grischunas en ina communicaziun a las medias.

Legenda: Guardar il video Las pendicularas grischunas fan in plus. Durada 02:20 minutas.
Or da Telesguard dals 02.01.2019.

La bun'aura e las pistas bellas hajan procurà quest december per blers visitaders, scrivan las pendicularas. Vinavant sajan ils dis da festa stads repartids bain: Dals dis da punt hajan profità er las pendicularas.

Unic en la regiun Tavau-Claustra hajan las pendicularas transportà durant il december pli paucs giasts che l'onn avant. Il pli grond augment haja quai dà en las regiuns Surselva ed Engiadin'Ota: Là eran bunamain 10% dapli osps sin pista.

In plus marcant en il december relativeschan las pendicularas grischunas gist puspè en lur communicaziun: Uschia hajan ellas bain fatg il december var 16% dapli svieuta da transport – ma quel stettia surtut en en connex cun pretschs d'entrada dinamics sco er cun dapli purschidas.

En l'entira Svizra en general in bun start

En Svizra èn tant il dumber dals giasts (+6%) ed ils transports da persunas (+10,6%) sur la media dals ultims 5 onns. Dapli giasts ch'en la media da 5 onns han surtut las pendicularas en il Vad e Friburg (+11,4%), la Svizra Centrala (+10,7%) ed en il Grischun (+8,6%) registrà. Tar il transport da persunas èsi surtut las pendicularas da la Svizra Centrala (+20,1%) e dal Grischun (+18,6%) ch'èn creschidas.

Legenda:
Svilup da giasts e transports da las pendicularas svizras Las cifras resultan dal monitoring da Pendicularas Svizra ch'observescha il svilup dals giasts (emprimas entradas) e dals transports da persunas (svieuta). Federaziun Pendicularas Svizra

RR novitads 17:00+