Siglir tar il cuntegn

Header

video
Kevin Brunold è il nov president da la PCD Grischun
Or da Telesguard dals 03.09.2020.
laschar ir
cuntegn

Politica Kevin Brunold è il nov president da la PCD Grischun

Ina cumissiun per chattar candidats per il post aveva avant la delegada proponì Brunold ed i n'è uschia era betg vegnì tar ina surpraisa. Unanimamain (70 vuschs totalas) èn delegadas e delegads suandads a la proposta ed han elegì l'um da la Surselva sco lur nov president.

Brunold/Brigger suondan ad Engler/Casutt

Kevin Brunold ha 35 onns e vegn oriundamain da Surcuolm nua ch'el abita era uss puspè cun sia famiglia. El ha studegià economia privata ed è enconuschent tras sia funcziun sco mainafatschenta da Surselva Turissem. Plinavant è el dapi l'onn 2018 deputà dal Cussegl grond.

La PCD Grischun è il mument en in bun stan ed jau sun plain fidanza che quai va vinavant uschia era sut la nova presidenza.
Autur: Kevin Brunoldnov president PCD Grischun

Era sin la posiziun da la vicepresidenta hai dà ina midada: Yvonne Brigger da Zizers surpiglia il post da Silvia Casutt da Falera. Brigger ha rimnà emprimas experientschas politicas sco candidata per il Cussegl naziunal l'onn 2019 ed è era substituta da la suprastanza communala da Zizers.

Plinavant èn quatter ulteriurs commembers da la direcziun da la PCD Grischun vegnì reelegids: Alessandro della Vedova (segund vicepresident), Niculina Laim, Reto Crameri e Livio Zanetti.

Naginas surpraisas pertutgant las parolas

Sper las elecziuns da la partida chantunala ha la PCD Grischun era prendì parolas tar trais iniziativas da la dumengia da votaziuns dals 27 da settember. Qua hai dà naginas surpraisas. La partida chantunala è suandada tar tuttas iniziativas discutadas a l'opiniun da la partida-mamma:

  • Iniziativa da limitaziun: Na (69 cunter 1 vusch)
  • Novs aviuns da cumbat: Gea (67 cunter 3 vuschs)
  • Lescha da chatscha: Gea (unanimamain cun 70 vuschs)
Kevin Brunold tegna pled.
Legenda: Kevin Brunold ha tegnì pled davant delegadas e delegads en la sala dal Marsöl a Cuira. RTR, Pietro Jacomet

RTR novitads 06:00

Artitgels legids il pli savens

Scrollar a sanestra Scrollar a dretga