Cun la finamira da tegnair enavos automobilists da viagiar en il sid, fa la Polizia chantunala quels dis controllas d'automobilists ed infurmescha quels davart la situaziun en il Tessin. Sco Roger Padrun, il vicemanader da la polizia da traffic, ha ditg envers SRF, ha la Polizia chantunala dapi la gievgia durant var 5 uras controllà var 280 autos ch'eran da viadi vers il sid. E da quels ha la polizia pudì persvader radund 10% da turnar a chasa e betg far il viadi en il Tessin.
Naginas colonnas al Gottard
Fin uss na datti naginas colonnas avant il tunnel dal Gottard. L'appel urgent dal Cussegl federal da restar a chasa e ch'ils cunfins èn serrads paran da far lur effect. La polizia chantunala dad Uri observescha tuttina la situaziun ed er en ils auters chantuns è la polizia preschenta.
En l'entira Svizra patruglieschan las polizias stediamain per guardar ch'i na dettia en il spazi public naginas gruppas cun dapli che 5 persunas. - La polizia chantunala da Son Gagl è vegnida en acziun dad ier fin oz a bun'ura 52 giadas en connex cun las reglas pervi dal coronavirus.
Il pli savens èsi stà pervi da festas da grill il suentermezdi e la saira. Sco quai che la polizia chantunala communitgeschan sajan en ils pli blers cas las persunas sa tegnidas vid las ordinaziuns. Nua che quai n'era betg il cas hajan las patruglias tschertgà il discurs ed anc ina giada declerà las reglas per limitar la derasaziun dal virus.
