Siglir tar il cuntegn

Header

cuntegn

Posiziun da la regenza Regenza deplorescha tractament da Quadroni

La regenza deploreschia che betg tut las instituziuns hajan agì cumplainamain correct envers Adam Quadroni. Quai ha ditg il cusseglier guvernativ Peter Peyer en il num da la regenza grischuna. Consequenzas persunalas na tira el naginas.

Peter Peyer e davostiers Andreas Brunner.
Legenda: Il cusseglier guvernativ Peter Peyer ha preschentà las mesiras a las medias. Keystone

La regenza grischuna deplorescha - na sa perstgisa dentant betg tar Adam Quadroni. Il cusseglier guvernativ Peter Peyer argumentescha quai uschia: Il mument sajan anc pendentas pliras inquisiziuns - saja quai da la procura publica sco era da la PUK.

Naginas consequenzas per Walter Schlegel

Era sch'il rapport da l'expert Andreas Brunner vegn pli u main a la medema conclusiun sco la PUK, numnadamain che las autoritads n'han betg agì a moda correcta tar l'arrestaziun dad Adam Quadroni, na datti naginas consequenzas persunalas.

Jau hai cumplaina fidanza en mias collavuraturas e mes collavuraturs.
Autur: Peter PeyerSchef dal Departament da giustia e polizia

En ses rapport crititgescha Andreas Brunner cleramain la direcziun da la Polizia chantunala. Sco gia la PUK, ha el constattà ch'ils responsabels surpiglian memia pauc lur responsabladad da manar e da controllar.

Focus sin realisaziun da mesiras

La regenza grischuna è leda che l'analisa administrativa è ussa terminada e ch'i na dat nagin connex cun il cartel da construcziun en l'Engiadina. Ella veglia uss drizzar ses focus sin la dumonda, nua ch'ella e las collavuraturas ed ils collavuraturs possian optimar lur lavur. La regenza preschenta perquai in pachet da mesiras ch'èn per part gia realisadas u ch'ins è londervi da realisar:

  • Introducir in management chantunal da privel (part dal program da la regenza 2021–2024)
  • Introducir il program da computer «Octagon» per identifitgar smanatschas (realisaziun fin la fin da l'onn 2020)
  • Nova organisaziun dal commando da polizia per il 1. da matg 2019
  • Controllar meglier quant effectiva che la scolaziun è aifer la polizia (en realisaziun dapi la fin da l'onn 2017)
  • L'unitad d'intervenziun na fa nagins transports pli da persunas che vegnan ospitalisadas en ina clinica psichiatrica (dapi il matg 2018)
  • Analisar la situaziun da la Polizia chantunala concernent ils puncts debels numnads en il rapport (fin la primavaira 2020)
  • Meglierar la documentaziun tar la KESB (gia dapi la fin da l'onn 2018)
  • Sclerir pussaivladads da scolar medis districtuals (en realisaziun)

RTR novitads 10:00++