Possessurs da mises ston pajar taxa da turissem, dentant...

Possessurs d'abitaziuns secundaras ch’abiteschan en la medema vischnanca duain en il futur pajar taxa da turissem – pertutgads èn cunzunt possessurs d’aclas u da mises. Quai ha il Cussegl grond decidì unanim cun 109 vuschs.

aclas e stallas l'enviern Bild in Lightbox öffnen.

Legenda da maletgs: La revisiun da la lescha pertutga cunzunt possessurs d'aclas u mises ch'abiteschan en la medema vischnanca. Keystone

Possessurs d'abitaziuns secundaras ch’abiteschan en la medema vischnanca duain en il futur pajar taxa da turissem. Pertutgads da quella midada da lescha èn cunzunt possessurs d’aclas u da mises. Pajar ston els dentant mo sche la vischnanca investescha pli pauc ch’en media 10% da las entradas da taglia en il svilup dal turissem. La lescha va en vigur il 2018 retroactiv. Quai pervia dal termin da referendum che scada pir il mars.

Revisiun da turbo

Igl è stà ina revisiun da turbo, pir il settember ha la regenza annunzià da vulair far la revisiun. Lura n'ha quai er dà nagina consultaziun ed en il Cussegl grond n'ha la revisiun er betg dà da discutar. Aifer gnanc mes'ura e senza discussiun ha el decidì unanim cun 109 vuschs la revisiun parziala.

Pertge la revisiun?

La raschun persuenter: Per evitar che mintga vischnanca stoppia adattar la lescha communala da turissem, ha la regenza decis da reveder la lescha chantunala. La soluziun saja en l’interess da las vischnancas e possia era vegnir realisada svelt.

Sche la revisiun na vegnia betg fatga, possia quai esser che possessurs d'abitaziuns secundaras esters sa refereschan sin l'egualitad da dretg, pia ch'els vegnian tractads tuttina sco ils indigens. Uschia ch'els na stuessan betg pajar taxas, e quai muntass per bleras vischnancas in grond deficit.

RR novitads 18:00