Heinz Brand dat giu il timun da la PPS grischuna la fin dal schaner 2020.
La direcziun da la partida haja prendì enconuschientscha, a chaschun da lur sesida ils 31 d'october, da la demissiun da Heinz Brand sco president da la partida, scriva la partida en ina communicaziun. La direcziun da la partida deploreschia ferm la demissiun da Brand, chapeschia però era ses giavisch.
Main politica e dapli lavur sco giurist
Heinz Brand resta vinavant president da Santésuisse. Cun ses 64 onns patratga el natiralmain era plaunsieu vi da la pensiun. El haja dentant planisà ina demissiun en etappas.
Ils ultims onns n’hai jau betg gì bler peda per il sport, uss ma legra jau d’avair dapli flad.
Cun la demissiun sco president da la PPS grischuna haja el uss dapli temp per la famiglia ed ils hobis, sur tut per il sport.
Brand aveva annunzià gia la primavaira passada da vulair dar giu proximamain il presidi. Tar las elecziuns naziunalas avant stgars duas emnas n'è el betg vegnì reelegì sco cusseglier naziunal. Ina successura u in successur da Brand vegnia elegì a chaschun da la proxima radunanza da delegads il schaner.
RR novitads 14:00