Siglir tar il cuntegn
cuntegn

Chantun PPS grischuna na vul betg entrar en la debatta

La partida populara dal Grischun crititgescha la moda e maniera co la regenza vul reveder la lescha davart la planisaziun dal territori. La PPS ha decis da betg entrar en la debatta cura ch'il Cussegl grond tracta la fatschenta la fin d'october.

Maletg dal messadi da la regenza
Legenda: Cun quest messadi messadi propona la regenza grischuna co reveder la lescha davart la planisaziun dal territori. RTR, Nadja Cadonau

La regenza saja strusch entrada sin propostas fatgas durant la consultaziun ed il sboz pericliteschia l'autonomia da las vischnancas, communitgescha la PPS.

En la revisiun vai surtut per zonas da bajegiar - quellas sto il chantun reducir e persuenter introducir in sistem da gulivaziun. Persunas che profiteschan d'ina midada da zona duain pajar ina taxa - persunas che perdan duain survegnir ina cumpensaziun.

Critica era da la PLD

La Partida liberala crititgescha ch'il chantun vegnia dividì en duas parts: Tschertas regiuns survegnian dapli zonas da bajegiar - autras stoppian reducir ellas. Uschia vegnia il chantun dividì en duas parts ed ils dretgs dals possessurs vegnian restrenschids. La PLD resalva il dretg, da refusar la revisiun aifer la debatta en il Cussegl grond.

Las ulteriuras fracziuns dal Cussegl grond n'han anc betg decidì en chaussa. Deputadas e deputads discuteschan la revisiun da la lescha davart la planisaziun dal territori ils 23 d'october 2018.

RR actualitad 15.00