La PPS vul crescher en las regiuns, nua ch’ella n’è betg uschè ferma sco per exempbel en il Surmeir u en la Surselva. Finamira centrala resta dentant d’augmentar la preschientscha en il Cussegl grond sco era da dumagnar en dus onns il sigl en la regenza. Quai han accentuà Heinz Brand, cusseglier naziunal e president da la PPS grischuna sco era Albert Rösti, president da la PPS Svizra a chaschun dal di da partida.
Mo cun la midada dal sistem electoral da proporz survegna la PPS tants sezs sco ella avess da bun en il Cussegl grond.
Avant dus onns aveva la PPS pudì dublegiar lur dumber da sezs en il Cussegl grond da quatter sin nov. Schebain quai gartegia anc ina giada dapenda tenor Heinz Brand fitg dal sistem electoral.
Midar il sistem electoral
La PPS grischuna vul per tut pretsch midar l’actual sistem electoral. Ella vul remplazzar il sistem da maiorz cun il sistem da proporz. Uschia vegnissan ils sezs numnadamain repartids tenor fermezza da la partida. Quai muntass che la PPS avess il dretg sin dapli sezs cunquai ch’ella è la pli ferma partida en il chantun Grischun. Sch’il parlament e la regenza na vegnian betg sez activ, lura vegnia la PPS eventualmain ad inoltrar in’intervenziun parlamentara u in’iniziativa per midar quest sistem electoral.
Recaltgar in sez en la regenza n’è betg simpel
Medemamain vul la PPS recaltgar in sez en la regenza per er esser preschenta là. Schebain quai saja il sez da la cussegliera guvernativa Barbara Janom Steiner u in auter n’emportia betg bler, di Heinz Brand. Impurtant saja quai che la politica da la PPS fetschia er part da la regenza.
Cuntanscher in tal sez n’è dentant betg simpel. Quai han ins era vis avant dus onns cura che Heinz Brand aveva candidà per la regenza e lura betg cuntanschì in sez.
Finamiras da la PPS Svizra
La PPS grischuna persequitescha – daspera las finamiras chantunalas – er las finamiras da la PPS Svizra. Era quellas èn stadas tema al di da partida. Uschia vul Albert Rösti d’ina vart nagina dependenza da l’Uniun europeica. Da l’autra vart vul el dentant mantegnair ils contracts bilaterals.
La PPS grischuna ha cun sia ferma basa contribuì bler al success da la PPS Svizra.
La segunda finamira è da be dar asil a persunas che dovran propi schurmetg, e betg a fugitivs che fugian ord motivs economics. Sco terza finamira vul la PPS tegnair bass la taglia per che l’economia possia sa sviluppar vinavant.
RR actualitad 07:00