PPS va cun Walter Schlegel en il cumbat d'elecziun

La partida PPS ha communitgà il glindesdi il num da ses candidat per la regenza.

Laschar ir video «PPS GR va cun in candidat en la cursa per la regenza»

PPS GR va cun in candidat en la cursa per la regenza

3:11 min, Telesguard dals 4.12.2017

La partida populara svizra dal Grischun va en il cumbat electoral per la regenza grischuna cun Walter Schlegel. Schlegel è dapi il 2012 cumandant da la Polizia chantunala dal Grischun.

Segirtad e stabilitad economica

En la regenza vuless Walter Schlegel cunzunt s'engaschar per ina politica fidaivla che dat segirtad e stabilitad. El veglia segirar las plazzas da lavur er en las regiuns perifericas e stgaffir bunas premissas per l'economia – tranter auter cun reducir la birocrazia e nizzegiar las pussaivladads da la digitalisaziun. Projects u ideas concretas n'ha el però betg numnà. Da principi è Walter Schlegel fidaivel a la lingia da la partida: El veglia s'engaschar per segirtad sco er per ils dretgs dal pievel.

Sursiglir cuntegn supplementar

Walter Schlegel

purtret da Walter Schlegel

mad

  • 55 onns
  • oriund da Poschiavo
  • bab dad ina feglia e dus fegls
  • advocat
  • fa gugent sport, legia gugent e giauda la natira

Il candidat da la PPS grischuna è plinavant da l'avis ch'i dovria ina politica communabla e collavuraziun da tut las partidas en la regenza grischuna per dumagnar las sfidas da l'avegnir. Sco grond avantatg vesa Walter Schlegel cunzunt sia experientscha da manar ch'el ha fatg en divers uffizis dal chantun, sco colonel en il militar e sco cumandant da la Polizia chantunala.

Er vesa el in stretg liom tar l'economia cun ses anteriur uffizi en la suprastanza communala da Trimmis e cun la funcziun dal president dal cussegl d'administraziun da la Realta Biogas AG ch'el ha gì durant tschintg onns.

Nagina dunna sco candidata

Valerie Favre Accola ch’era medemamain vegnida numnada sco pussaivla candidata vegnia a candidar per il Cussegl grond. Quai ha la secretaria da la PPS Grischuna ditg a la conferenza da medias.

Las elecziuns per la regenza grischuna han lieu ils 10 da zercladur 2018.

RR novitads 11:00