Ils architects Barozzi Veiga da Barcelona che han bajegià il Museum d'art dal Grischun a Cuira vegnan premiads cun il premi internaziunal dal Royal Insitute of British Architects RIBA. La giuria che sa cumpona d'experts britannics ed internaziunals onurescha cun il premi «Ils edifizis ils pli impurtants ed inspirants da l'onn 2018».
Criteris per la giuria èn ch'ils projects sa distinguan tras l'ambiziun architectonica ed ina realisaziun excellenta. Anc pli impurtant èsi dentant da mussar ch'edifizis cun ina buna concepziun pon prestar ina contribuziun impurtanta per la societad e per la vita da mintgadi. Quai saja il cas tar il Museum d'art dal Grischun.
Ultra dal Museum d'art dal Grischun han 20 auters edifizis da l'entir mund survegnì quest titel. Ils titulars dal premi han gudagnà cunter tschients projects da passa 50 pajais. Il Royal Institute of British Architects (RIBA) ha sia sedia a Londra.
RR novitads 10:00