Il premi d’innovaziun 2020 da l’Uniun grischuna d’artisanadi e mastergn va ad Adrian Hirt, il fundatur e possessur da la AlpenHirt SA a Tschiertschen. Sco l’uniun scriva, haja Hirt vesì baud ch’ils consuments veglian adina pli savens mangiativas producidas a moda natirala. E cun perseveranza haja el fatg enconuschent sin il martgà questa vivonda d’auta qualitad.
La firma AlpenHirt producescha en collavuraziun cun producents locals radund 15 tonnas charn setgentada ad onn. Ed ils products chattian ils consuments en l’entira Svizra, en tozzels d’affars da delicatessas.
Grond discletg il 2019
Adrian Hirt è da professiun tecnolog da victualias ed ha tranter auter lavurà en ina mazlaria gronda – ed era manà intgins mais ina mazlaria sin l’insla caribica Jamaica. Sia firma AlpenHirt ha el fundà il 2014. L’onn passà ha el gì grond discletg, cura ch’in fieu ha fatg gronds donns en sia butia, en ses magasin, en ses biro ed en sia abitaziun.
