Rolf Senti da Favugn è enconuschent sco profi-velocipedist e possessur da la fatschenta «Bagno Sasso Mobili» a Landquart. Quella fabritgescha sur tut products da luxus per il bogn, tranter auter ina bognera da lain. Ussa ha Rolf senti survegnì il premi d'innovaziun da l'uniun grischuna d'artisanadi e mastergn. Betg per in product da luxus, mabain per in'armatura cun bigl che spargna aua.
Mo ina scadiola aua per lavar ils mauns
Il «Swiss Eco Tap» spargna 90 pertschient da l'aua e 100 pertschient da l'energia. La tecnologia sprizza l'aua en ina sort nivla, e questa nivla surpiglia immediat la temperatura da l'aria, uschia na ston ins betg stgaudar l'aua. Normalmain dovran ins circa 6 liters per lavar 30 secundas ils mauns, cun questa tecnologia dentant mo ina scadiola.
En il futur dat quai guerras per l'aua, e betg per ieli.
Idea grazia a collegas muslims
L'idea per sia invenziun è vegnida a Rolf Senti a Dubai. Là ha el in biro e blers collegas muslims. Quels sa lavan 5 giadas a di per far oraziun. Dentant posseda Dubai mo pauc'aua, ed uschia è Senti vegnì sin l'idea da l'armatura che spargna aua. «En il futur dat quai guerras per l'aua, e na betg per ieli», di Rolf Senti.
Installar invenziun en moschea a Mecca
Questa vista globala, la visiun, dentant era la voluntad da tegnair la dira en in temp difficil ha persvadì l'Uniun grischuna d'artisanadi e mastergn da surdar il premi a Senti. Il grond siemi da Rolf Senti è dad installar sia invenziun en la moschea a Mecca.