Siglir tar il cuntegn

Header

Video
Corin Curschellas e sia amur per la chanzun rumantscha
Or da Cuntrasts dals 19.05.2013.
laschar ir
cuntegn

Chantun Premi da cultura 2018 per Corin Curschellas

La regenza grischuna surdat il premi da cultura 2018 a la chantadura ed artista Corin Curschellas. La chantadura da Rueun saja ina da las grondas vuschs dal Grischun e da la musica mundiala.

L'ovra da Corin Curschellas saja vasta, communitgescha la regenza. Ella chanta, suna clavazin, dulcimer, citra, harmonium indic, percussion, accordeon e synthesizer. Ella haja però era gia cumponì per Michael von der Heide, Vera Kaa e Dodo Hug. En la Svizra rumantscha è ella s'occupada sco archeologa da musica cun la chanzun populara – ha arranschà ed interpretà da nov chanzuns rumantschas veglias. E sco scolasta da musica a Glion intermedieschia e promovia Curschellas la cultura. Gist a Glion ha la chantautura er pudì prender encunter il premi.

I è forsa il pli grond premi da cultura dal Grischun ed uschia a quai ina enorma valita per mai.
Autur: Corin Curschellaschantadura e musicista

Dapli da l'ovra e la persuna Corin Curschellas chattais qua., il link avra en ina nova fanestra

Il 2010 era Corin Curschellas – ch'ha 61 onns – vegnida undrada cun in premi da promoziun. Il Premi grischun da cultura è dotà cun 30'000 francs.

Premis da renconuschientscha

Ultra da quai ha la regenza decidì da surdar premis da renconuschientscha ch'èn dotads cun 20'000 francs:

  • Madlaina Lys (1956) e Flurin Bischoff (1955), Lavin – per lur ovras cun fluras, ierts, picturas ed installaziuns.
  • Christoph Meier (1950), Malans – per l'engaschi sco ornitolog, fotograf e medi d'utschels che s'engascha per il mantegniment dal spazi da viver dals utschels.
  • Ivano Nussio (1957), Poschiavo/Brusio – per sia ovra sco dirigent, instrumentalist e scolast da musica cun engaschi per il Grischun talian e l'Engiadina.
  • Nikolaus Schmid (1976), Malans – sco actur liber sin tribuna ed en il film che s'engascha politicamain per il teater grischun.
  • Lucas Schwarz (1977), Trun/Zürich – per ses engaschi sco musicist, scolast e coach da bands en la scena da jazz grischuna e svizra.
  • Ludmila Seifert (1969), Cuira – per ses engaschi per la cultura da bajegiar.
  • Jules Spinatsch (1964), Turitg– per sia lavur cun foto, video ed installaziuns che punctuescha l'ambivalenza tranter esser e parair.
  • Roger Stieger (1968), Cuira/Scharans – sco tecnicist da glisch e designer dal teater en il Grischun.

Premis da promoziun

Ils premis da promoziun dotads cun mintgamai 20'000 francs van a l'actura Petra Aleardi (1985) da Grüsch, al scriptur Josy Battaglia (1980) da Poschiavo, a la chantautura Martina Gemassmer (1991) da La Punt, a l'actura Sara Francesca Hermann (1985) da Samedan, al ballarin Robert Jerjen (1999) da Cuira, a la band engiadinaisa «Polyphone» (Marcus Petendi, Simon Steiner, Valentin Bezzola) ed al percussionist Janic Sarott (1992) da Scuol.

RR novitads 17:00