Leo Tuor, scriptur da Rabius enritgeschia la litteratura cun istorgias captivantas e plain fantasia. El dettia in maletg multifar da la Surselva, e tgi che legia ovras da Leo Tuor survegnia in maletg multifar da la Surselva e da la vita en territoris alpins, argumentescha la regenza la surdada dal Premi grischun da cultura. La trilogia sursilvana furma sia ovra principala: Giacumbert Nau (1988), Onna Maria Tumera (2002) e Settembrini (2006).
Sias istorgias raquintan savens d'ina vita ch'el viva ed ha vivì. Sco nurser sin la Greina, sco chatschader en la pizza e la vita dal vitg en nossas valladas. Las dumondas filosoficas da la vita pachetescha el en texts spess ch'han in agen ritmus.
Claudio Spescha che translatescha mainsvart ses texts di: «Quella cumbinaziun denter poetic, litterar, che lavura culs mitos da la litteratura e quai davent da l'antica entochen la filosofia mundiala, tochen tar Muoth ed il teater popular en nossas vals, quella cumbinaziun e quest mix ambientau cun litteratura mundiala e quai il pli sisum la pizza, quai dat ei mo tier el.»
Per ina proxima ovra veglia el far insatge nov. Naginas repetiziuns d'istorgias gia scrittas. Tge exact che quai pudess esser na saja anc betg cler. Dentant pudess Tuor era s'imaginar in cudesch autobiografic.