Siglir tar il cuntegn

Header

audio
Luca Maurizio, Asa S. Hendry ed Ursina Trautmann survegnan il Premi grischun da litteratura
Or da Actualitad dals 28.01.2021.
laschar ir. Durada: 02:35 minutas.
cuntegn

Premi grischun da litteratura Onuradas vegnan trais persunalitads grischunas

Cun surdar il premi ad Asa S. Hendry, Ursina Trautmann e Luca Maurizio onurescha la Fundaziun premi grischun da litteratura l'activitad litterara en in senn pli vast – pia en tut sias diversas furmas d’expressiun actualas, scrittas ed oralas, analogas e digitalas.

Il Premi grischun da litteratura 2021 vegn repartì sin trais persunalitads da tut las trais regiuns linguisticas. Tuttas trais persunas sajan sa distinguids cun lur activitad litterara en in senn vast: dal roman a texts poetics, da chanzuns e da texts dramaturgics ad artitgels schurnalistics, scriva la schuria.

  • Asa S. Hendry survegn il premi per ses emprim roman remartgabel «Sin lautget» en lingua rumantscha. Quel tracta da maniera poetica e cun gronda sensibilitad ed intelligenza tematicas fitg sensiblas ed actualas.
  • Ursina Trautmann survegn il premi per sia activitad litterara multifara ed engaschada en lingua tudestga che va da la dramaturgia al schurnalissem.
  • Luca Maurizio chantautur e cabarettist da lingua taliana e bregagliotta, survegn il premi per il tun poetic da sias chanzuns e per la satira lucida da la societad che s’exprima en sias preschentaziuns divertentas e murdentas.

Il futur dal Premi da litteratura è garantì

La Fundaziun premi grischun da litteratura surdat quest onn per la 23avla giada il premi da litteratura ch'è dotà cun 10'000 francs. Tenor la fundaziun è il chapital da fundaziun uschia duvrà si. Il futur dal premi è perquai ditg stà intschert.

Sco il Bündner Tagblatt scriva en sia ediziun da la gievgia ha uss Köbi Gantenbein, l'editur dal magazin «Hochparterre» e president da la Cumissiun da cultura grischuna, decis da salvar il premi. Entant haja el gia ramassà var 65'000 francs per la Fundaziun premi grischun da litteratura. Finamira saja da rimnar en tut 100'000 francs uschia ch'il premi fiss garantì per ils proxims 10 onns.

Previs èsi tenor il Bündner Tagblatt che Köbi Gantenbein surpiglia la primavaira il presidi dal nov cussegl da fundaziun. Il cussegl da fin uss cun Anna-Alice Dazzi a la testa vegnia lura a sa retrair in corpore.

RTR novitads 20:00

Artitgels legids il pli savens

Scrollar a sanestra Scrollar a dretga