Siglir tar il cuntegn

Chantun Presidi Lia: «Las dunnas che nus avain dumandà n'han betg vulì.»

Dapi sonda èsi cler: Duri Bezzola chala e Johannes Flury duai surpigliar sia batgetta sco president da la Lia Rumantscha. Ina ni l'autra pudess bain pensar: Tut va pia sco usità, in um vegn per in auter um. Per la Lia è quai dentant mai stà in criteri da selecziun: um ni dunna.

Maria Sedláček, l’unica dunna en la suprastanza da la Lia Rumantscha.
Legenda: Maria Sedláček, l’unica dunna en la suprastanza da la Lia Rumantscha. ANR

La suprastanza da la Lia Rumantscha saja bain s'occupada fitg ferm cun la dumonda, tgi che duaja succeder al president partent, Duri Bezzola. La dumonda, um ni dunna, n’è tenor Maria Sedláček, dal reminent la suletta dunna en la suprastanza da la Lia Rumantscha, dentant mai stà in criteri per la selecziun.

Jau crai ch’i na dependa betg sch’igl è in um u ina dunna, ins sto plitost mirar d’avair ina buna persuna.
Autur: Maria Sedláčeksuprastanta Lia Rumantscha

«Jau vi en emprima lingia in bun president u ina buna presidenta», di Maria Sedláček. Els hajan fatg ina tscherta evaluaziun e Johannes Flury saja sa mussà sco in fitg bun candidat. «Jau crai era ch’i na dependa betg sch’igl è in um u ina dunna, ins sto plitost mirar d’avair ina buna persuna.» Quei che na veglia dentant betg dir, che la suprastanza da la Lia n’haja betg era contactà dunnas durant la fasa dad evaluaziun, per dumandar sch'ellas avessan gust da candidar per il presidi.

La suprastanza haja era dumandà dunnas, dentant: «Quellas persunas che nus avain dumandà, n’han betg vulì surpigliar il presidi da la Lia Rumantscha», constatescha Maria Sedláček. Cun tgi exact e cun quantas dunnas che la suprastanza ha insumma manà discurs, n’ha tradescha ella dentant betg.

Decisiun fin october

L’Uniun dals Grischs, l’Uniun Rumantscha Grischun Central e la suprastanza da la Surselva Rumantscha sustegnan la candidatura da Johannes Flury sco nov president da la Lia Rumantscha. Sch’el daventa lura era quai, decidan las delegadas ed ils delegads da la Lia lura ils 31 d'october 2015 a Mustér.