Siglir tar il cuntegn
Inhalt

Chantun Prest 5 giadas dapli tschiervs crappads

Durant il dir enviern èn crappads 2'342 tschiervs. Quai èn prest 5 giadas dapli che l'onn avant. Tuttina dastgan ils chatschaders sajettar quest onn 60 tschiervs dapli che l'onn passà.

Legende: Video Dapli tschiervs – malgrà in dir enviern abspielen. Laufzeit 02:07 Minuten.
Or da Telesguard dals 25.06.2018.

La gronda populaziun e las diras cundiziuns d'enviern han chaschunà in aut dumber da selvaschina disgraziada. Enfin ils 25 da matg ha l'uffizi da chatscha dumbrà 2'342 tschiervs crappads, quai èn prest 5 giadas tants sco l'onn avant. Plinavant èn 3'162 chavriels, 972 chamutschs e 303 capricorns crappads.

Malgrà quest dumber aut pon ils chatschaders grischuns sajettar quest atun 5'430 tschiervs. Quai èn 60 dapli che l'onn 2017. La populaziun da tschiervs vegn schazegiada sin radund 16'500 animals. Quai èn be 100 pli paucs che l'onn passà.

Populaziun crescha ad in crescher

Dumbrà ina pli gronda populaziun da tschiervs han ils guardiachatschas sur tut en las regiuns che han blera selvaschina che vegn natiers l'enviern dad auters chantuns, pajais e provinzas. Dumbrà han els numnadamain radund 13'000 tocs, 1'400 dapli che l'onn passà.

Tar ils chavriels saja la situaziun autra. Là ha il dir enviern chaschunà ch'il dumber è sa reducì marcantamain. Davart ils chamutschs ed ils capricorns vegnian las dumbraziuns da la stad e da l'atun a dar scleriment definitiv davart il dumber.

Regulaziun consequenta saja necessaria

En intginas regiuns haja la populaziun da chavriels e tschiervs surpassà ina grondezza supportabla, scriva l'Uffizi da chatscha e pestga. Quai haja chaschunà dapli conflicts en ils guauds ed en l'agricultura. La regulaziun consequenta, en spezial da tschiervs e chavriels stoppia perquai vegnir cuntinuada. La regulaziun saja dasper il ruaus durant l'enviern e las bunas pastgiras durant la stad e l'atun, la pli impurtanta premissa per che la selvaschina possia surviver l'enviern.

RR novitads 11:00