Siglir tar il cuntegn
Inhalt

Chantun Preventiv 2019: Deficit da bunamain 34 milliuns

Il chantun Grischun prevesa per l'onn proxim in deficit da bunamain 34 milliuns francs. Tuttina è Barbara Janom Steiner cuntenta e numna las finanzas "solidas". Ella ha preschentà ses ultim budget sco ministra da finanzas - in mument spezial.

Legende: Video Preventiv 2019 dal chantun Grischun abspielen. Laufzeit 02:28 Minuten.
Or da Telesguard dals 29.10.2018.

In deficit da 34 milliuns francs saja bunamain in preventiv gulivà, ha accentuà la ministra da finanzas oz avant las medias. En relaziun cun extradas totalas da 2.5 milliardas francs saja quai in deficit acceptabel dad 1.3%.

Vinavant investiziuns da record

La regenza grischuna vul ir vinavant la strategia d'investir per sustegnair l'economia grischuna. L'onn 2019 èsi previs d'investir 446 milliuns francs - quai è pli u main tuttina bler sco il 2018. Surtut projects gronds custian actualmain bler: La praschun a Cazas, il center d’administraziun Sinergia a Cuira ed il tunnel da viafier Alvra.

Adina dapli custs per premias da cassas da malsauns

In post da custs fa dentant quitads a la ministra da finanzas: Adina dapli persunas na pon betg pajar las premias per las cassas da malsauns e perquai s'augmentan era las contribuziuns dal chantun per las reducziuns da cassas da malsauns.

Ils ultims 10 onns èn questas contribuziuns sa dublegiadas: En il quint dal 2008 muntavan ils custs anc a 62 milliuns francs - en il budget 2019 èsi previs passa 122 milliuns francs.

La grafica musa co ch'ils custs creschan
Legenda: Mellen: Adina dapli custs per contribuziuns a persunas che na pon betg pajar las premias da las cassas da pensiun e che han dabun ina reducziun da las premias. MAD Administraziun da finanzas GR

Nagin program da spargn, mabain "GR Flex"

Tut en tut quinta Barbara Janom Steiner cun quints pli u main equilibrads a curta vista. A partir dal 2022 pudess quai dentant dar cifras cotschnas. Perquai saja dad esser pront: La regenza grischuna preschenta il december ses project "GR Flex" - quasi l'alternativa ad in program da spargn.

L'idea è da surlavurar en tut 15 leschas chantunalas e da guardar che quellas na cuntegnian naginas obligaziuns fixas da dar ora daners. Las leschas duain vegnir flexibilisadas uschia, ch'il Cussegl grond po decider aifer sias debattas da spargnar tut tenor basegn - senza stuair mintgamai anc reveder singulas leschas.

I n'è betg simpel da stuair smetter.
Autur: Barbara Janom SteinerMinistra da finanzas GR

Igl è stà l'ultima giada che Barbara Janom Steiner (PBD) ha preschentà il budget a las medias. Adina puspè ha ella ditg ch'i saja ina situaziun speziala e ch'i na saja betg simpel da surdar l'entir dossier da finanzas a ses successur Christian Rathgeb (PLD). Insumma dettia il mument fitg bleras dernieras per ella.

La politicra da 55 onns è dapi il matg 2008 cussegliera guvernativa - l'emprim sco scheffa dal departament per giustia, segirezza e sanadad e dapi il 2012 sco ministra da finanzas. Il matg 2019 cumenza ella sia lavur sco presidenta dal cussegl da banca da la Banca naziunala Svizra (SNB).

Ina derniera èsi era per Andrea Seifert: Suenter 10 onns sco schef da l'administraziun da finanzas mida el l'avrigl 2019 tar la Cassa da pensiun dal chantun Grischun.

RR novitads 10:00