Siglir tar il cuntegn

Header

cuntegn

Prim da matg – di da lavur Appels da solidaritad, manifestaziuns, pretensiuns

En il connex cun l'emprim da matg pretenda l’Uniun sindicala dal Grischun meglras cundiziuns da lavur per lavurants e lavurantas. Sin Twitter appellescha il Cusseglier federal Alain Berset per solidaritad. En differents lieus hai dà demonstraziuns e manifestaziuns durant il di da la lavur.

La pandemia haja laschà crescher la malsegirtad ed il squitsch entaifer la fiera da lavur, scriva l’Uniun sindicala dal Grischun. Gist il persunal cun pajas bassas, il persunal en lavur curta u las persunas senza lavur pateschian fermamain da la pandemia. Lavurantas e lavurants duain perquai vegnir indemnisads e distgargiads meglier.

Applaudir na basta betg

En quest connex numna l'uniun il persunal da tgira che saja essenzial per surmuntar la pandemia da Covid-19: I na bastia betg da be applaudir per il persunal – politicras e politichers duain reagir immediatamain e crear cundiziuns attractivas da lavur, per che quellas professiuns restian attractivas. Cunzunt en vista a crisas futuras saja necessari che la Svizra haja avunda persunas dal fatg per esser preparada meglier.

audio
Per tadlar: curt e cumpact
ord RTR Audio dals 01.05.2021.
laschar ir. Durada: 1 minuta 7 Secundas.

Alain Berset pretenda solidaritad

Solidaritad durant la pandemia, dentant era suenter la crisa: quai pretenda il Cusseglier federal Alain Berset en ses pled via Twitter.

La crisa da corona funcziunia sco autras crisas, numnadamain ch'ils pli flaivels pateschian il pli fitg. Las inegualitads s'augmentian e surtut plazzas cun pajas bassas sajan periclitadas. E questa crisa tutgia cunzunt las dunnas, ha il cusseglier federal socialdemocratic menziunà.

40 manifestaziuns en differents lieus

En var 40 lieus dettia durant il prim da matg manifestaziuns e demonstraziuns. Uschia han la sonda demonstrà passa 1'000 persunas tar ina demonstraziun lubida a Basilea. Lur pretensiun centrala è ina paja minimala da 23 francs l'ura. Dominà il cortegi han diversas gruppaziuns. Ils sindicats tradiziunals han tegnì ina tscherta distanza a la fin dal cortegi ed eran plitost en la minoritad. Cun exzepziun d'ina pitschna charplina cun la polizia ed ina dispita interna a la fin, saja restà paschaivel, ha communitgà la polizia.

audio
Per tadlar: Per gronda part pitschnas e paschaivlas manifestaziuns
ord RTR Audio dals 01.05.2021.
laschar ir. Durada: 1 minuta 1 Secunda.

Las bleras manifestaziuns èn dentant stadas en in rom pitschen, cunzunt pervi da las mesiras cunter il coronavirus. Uschia er en la citad da Turitg. Là hai dà divers disturbis ed interrupziuns dal traffic pervi da differents eveniments en connex cun il di da la lavur. Dasper manifestaziuns da sindicats en differents lieus hai er dà in cortegi curt da demonstrants tras citad. Ina manifestaziun plitost simbolica, cun in tractor al chau ed il comité dal prim da matg, è ì sur il Limmatquai e tras la Langstrasse.

Cunter ina demonstraziun illegala ha la polizia reagì. Tozzels da polizistas e polizists èn stads pronts en equipament da protecziun e cun vehichels. Els han entscherclà plirs demonstrants en la citad. Tant en la citad da Tritg sco er en la citad da Berna valiva ina limita da sa radunar cun maximalmain 100 persunas.

L’Uniun sindicala dal Grischun desista quest onn da la festa tradiziunala – quai pervi da la situaziun actuala da Covid-19. Percunter datti ina radunanza virtuala cun giasts prominents sco la cussegliera federala Simonetta Sommaruga.

Ord l'archiv

Co vai cun il persunal da tgira? Quella dumonda tematiseschan ils «Cuntrasts». Il film mussa la lavur e las sfidas actualas da trais tgirunzas.

video
Cun corp ed olma – lavur en la tgira
Or da Cuntrasts dals 14.03.2021.
laschar ir. Durada: 25 minutas 40 Secundas.

RTR novitads 06:00 +

Artitgels legids il pli savens