Siglir tar il cuntegn

Header

audio
Saira: Privel d'incendis – Anc vala stgalim 3, considerabel
Or da Actualitad dals 26.07.2019.
laschar ir. Durada: 2 minutas 16 Secundas.
cuntegn

Privel d'incendis Anc vala stgalim trais da tschintg – considerabel

En l'entir Grischun vala per il mument in privel d'incendis da guaud considerabel. Quai tenor l'uffizi da guaud e privels da la natira. Quai munta che zulprins che ardan u era sbrinzlas d'in fieu da gril pon chaschunar in incendi. E sch'i na dat betg ina plievgia pli gronda crescha il privel.

Ins possia senz'auter discurrer d'ina situaziun delicata, uschia il responsabel da l'Uffizi per guaud e privels da la natira Andrea Kaltenbrunner. La situaziun actuala saja tranter privel considerabel e privel grond (stgalims 3 e 4).

Sch'i na dat uss nagina plievgia, na pudain nus betg laschar tuttina. La chalira cuntinuescha oz e damaun. E nus essan al cunfin tar il privel grond en la val dal Rain uschia che nus stuessan auzar sin privel grond.
Autur: Andrea Kaltenbrunner Uffizi per guaud e privels da la natira

Sch'i vegnia sco annunzia dumengia ina plievgia pli gronda, lura fissi pussaivel ch'il privel stat en las bleras regiuns sin il stgalim actual, considerabel. En regiuns pli autas sco l'Engiadin'Ota fissi tenor Andrea Kaltenbrunner tut tenor era pussaivel da sbassar il stgalim da privel sin moderà.

Dar adatg cun fieus averts e sbrinzlas

Sper sbrinzlas d'in fieu avert u ina cigaretta betg stizzada endratg po era gia in chametg chaschunar in incendi da surfatscha. Ultra da quai sa derasa l'incendi fitg spert en territori avert ed en il guaud. Tar il stgalim considerabel pon ins stizzar in incendi da guaud mo cun isegls moderns e spezialists.

Quai tut ha per consequenza ch'ins dastga il mument mo far fieu da gril en fuainas existentas, ins sto avair en egl il fieu, stizzar las sbrinzlas immediat sco er stizzar il fieu dal tuttafatg cun aua. Plinavant èsi en mintga cas da far quai che las autoritads localas decidan.

Tar privel grond suondan ils scumonds

Sch'il stgalim da privel vegn auzà da considerabel sin grond datti pli probabel er scumonds da far fieu:

  • En vischinanza dal guaud, sin basa da la lescha da guaud.
  • Scumonds locals tenor las autoritads communalas
  • Scumonds u restricziuns en connex cun fieus artifizials (era en la cumpetenza da las vischnancas).

RR novitads 06:00 / actualitad 17:00

Artitgels legids il pli savens