Siglir tar il cuntegn
cuntegn

Chantun Privel da lavinas è creschì sin stgalim 4: Grond

Malgrà ch'il privel da lavina è sa reducì, èn idas a val en la regiun da Tavau sco era en il chantun Son Gagl trais lavinas ch'han chaschunà duas unfrendas e blessads. Tenor l'Institut federal per la perscrutaziun da naiv e lavinas nagina casualitad.

carta che mussa privel considerabel en il nord da las alps
Legenda: La situaziun dal privel da lavinas en Svizra: Privel grond (cotschen), considerabel (oransch), moderà (mellen), pitschen (verd). mad / SLF (stan 5-1-2019/17:00)

Ils ultims dis han pliras lavinas en il Grischun, en il chantun Uri e S. Gagl chaschunà unfrendas. A Tavau è mort in um da 31 onns, a Flumserberg in um da 56 onns. Il privel da lavinas è creschì sin stgalim 4, quai che munta grond. Sin quai livel capitan blers accidents. Il pais dad 1 persuna basta per metter en moviment ina lavina, declera Christine Pielmeyer da l'institut per naiv e lavinas a Tavau (SLF).

Naiv nova e vent dal nord fan fullas da cuflads

La naiv nova ed il ferm vent dal nord dals ultims dis ha procurà per fullas da cuflads ch'èn instabils e pon ir a val sco ruttivas. Era privlusa è la situaziun en lieus stips e pendents vers il nord sur 2'400 meters sur mar. Là – en la naiv veglia – pon parter era lavinas pli grondas.

Nagina migliur la fin d'emna

Era ils proxims dis na datti anc betg ina meglieraziun cun la naiv ch'è annunziada. L'institut avertescha skiunzs e skiunzas da turas e da variantas d'esser precaut – i dovria blera experientscha per valitar la situaziun.

RR novitads 17:00